LAKASA | Iluko Writings Online

BAYAKABAK

2008-10-05T02:09:00.000-07:00

Danggayam,
mapartuat a samiweng
manglemmes saem
naruay a dagensen.

Dalusam,
babaen parabur a tedted
mangugas kullaap
nakipagtaeng nakem.

Insangbaymo,
dakulap ti langit
sagut a wayawaya,
binalud saem a di pumakada.

Ramut...

2008-07-28T08:46:00.000-07:00

RAMUT ITI PUNGANAY

Leofina Jane Galleta
11/28/2007 5:58:22 AM

“Fina, bumaba kan ta mangantan. “

Nasinga ti panangdumog ko iti sursuratek a business proposal idi mangngeg ko ti boses ni Inang Rosing. Nakabakasyonak pay laeng manipud iti trabahok iti World Vision bayat iti panagpalpalaing ko.

“Wen Inang, umayakon, “ insungbat ko. Impalunipin ko dagiti gamigam ko bayat iti panag shut down ti kompyuter ko. Dinaras kon ti bimmaba tapno saanen nga ipidua ni Inang ti pulikkaaw na.

Tinola a nalaokan ti bulong parya ti nakadasar iti lamisaan. Dua kami laeng ita ken Inang Rosing ta adda iti trabaho ni Tita Meh, ken adda met iti eskwela dagiti dua nga annak na.

“Aginana ka kuna ti doctor mo ket dayta met latta nakakubukob dita sango ti kompyuter mo nga ub-ubraem, lumaing ka aya ngarud no kasta? Daytoy to ket a tangken ti ulom nga ubing, “ atiddog a litanya ni Inang Rosing idi makasangon iti lamisaan. Kas iti nakadawyanan nan, simro manen ti kina-sermonitis na.

Saanakon a nagtagtagari tapno saanen nga umatiddog iti saritaan. Uray dadakkel kamin ket saan nga itulok ni Inang Rosing a sumungsungbat kami no kasta a naka “sermonitis mode”.

Saanen a nangasawa ni Inang Rosing, buridek a kabsat ti Apong ko a lakay, ni Tatang Itok. Tallon a henerasyon iti pinadakkel na... Ti ikit ko, (kasinsin ni Papang), dua kami kenni Dennis, ken dagiti annak ni Anti Meh.

“Inang, kasano kayo a nakadanon diay Cagayan ket taga-Ilocos met amin a kakabagyan tayo no ar-arigen?”

Kas met iti sigud, iyaw-awan ko manen ti patangan tapno malipatan na ti agsermon.

Iti dayta a pangaldaw, insalin ni Inang Rosing kaniak ti lagip maipapan iti namunganayan ti lugar a dimmakkelak, ken iti panangdappat ti pamilya mi iti Cagayan...

*****************************

Tawen 1937, sakbay iti isasangpet dagiti Hapon. Daytoy a tawen ti panagdappat ti pamilya daydi Apong ko iti tumeng, ammok laeng iti nagan na nga Apong Ago (Feliciano) iti probinsya iti dayta a paset ti Cagayan.Panaguma wenno panagtrabaho iti Hacienda ti nakaallukoy kano ken daydi Apong Ago tapno sumina iti nagtaudan na a lugar sadiay Ilocos.

Segun ti estorya ni Inang Rosing, maysa a Hacienda ti nagsangpetan da kadagidi a panawen. Daytoy a hacienda (kukua ti pamilya a taga Ilocos Sur) ket nagbalin itan a barrio iti Villa. Saan kano pay idi a naikaraman a teritoryo ti sitio Namunit a parte ti Buguey, gapu ta iti laeng ballasiw ti karayan ti nagpatinggaan ti beddeng daytoy (boundary ti Centro East ken Centro West iti agdama, iti ili a Sta. Teresita). Ti sitio Namunit ti nagbalin nga ili ti Sta. Teresita, ti kaubingan nga ili iti probinsya ti Cagayan. Sakupen kano pay laeng idi ti Villa dagiti agdama itan a barrio ti Villa ken Centro East, agraman iti nagtakderan itan ti dapon ken munisipyo.

Iti lagip ni Inang Rosing, sangapulo a balay kano laeng ti nasangpetan da a nakatakder iti Villa. Dagiti Nalawa kano a kataltalonan daytoy a disso Ad-adu kano nga amang dagiti pamilya nga adda iti dadduma a purok a kas iti Gulasing ken Dungeg ngem dagiti agindeg iti Villa. Immadu laengen ti bilang da idi nalpas ti gubat, ket immakaren dagiti adda iti purok ti Gulasing ken Dungeg gapu iti risgo nga inted ti kaada dagiti HUK.

Adda dan iti Villa idi sumanglad dagiti Hapones. 1946 ti matandaanan ni Inang Rosing nga umuna nga idadateng dagiti Hapones iti Villa. Daydi Apong Ago ti agdama a tenyente del barrio. Mano a tawen a kinarkaradap da dagiti baddek da tapno saan ida a madangran ti gubat. Napadpadasan ka dano met ti nagbakbakwit iti banbantay. Iti pannakaleppas ti gubat, isu kano metten ti panawen a nanayunan ti bilang dagiti lumugar idi addan sabsabali pay a nagbangon iti balbalay da iti Villa.

Ditoy a lugar ti nagsarakan dagiti dalan ti apong ko a baket ken lakay. Maysa kadagiti bunga da ti amak. Nupay sadiay Ilocos ti nakayanakak, ad-adu a paset ti kinaubing ko ti pinalabas ko iti daytoy naulimek ken natalna a purok. No adda man naisalsalumina a saguday ti lugar a dimmakkelak, daytoy ket ti kinaasideg ti langit. Narimat nga agpayso dagiti maibun-ay a bitbituen kadagiti nangayed a sardam iti Villa. Kas man la na napagasatan daytoy a lugar nga arig na masukdal ti imatang dagiti nangayed a naimurumor a rimat iti awan pulos mulit na a sardam, kasta metten ti raniag dagiti sagpaminsan a lumabas a layap.

Nalabit, ditoy a nagkubbuar ket nagbiag ti ubbog ti pluma a tartaripatuek gapu iti nakaparsuan a nangtagibi kaniak. Dagiti narikna ken namatmatak a kinangayed a naibenggas iti ubing a karuruak ti nangted aweng kadagiti linabag nga ipuspusuak ti panunot ken riknak, no matukay iti sagpaminsan. Wen, daytoy a lugar ti nangtaripato ken nangmuli kadagiti ub-ubonek a balikas a nasagpawan kadagiti aweng a parnuayen ti managarapaap a nakem nga insagut ti namarsua kaniak.

©2007leofinajanegalleta

Maregmeg

2008-06-10T08:36:00.000-07:00

Matmatam,
Dagiti binukel
A maregmeg,
Dagiti tagainep.

Bagnos,
Di agsarday a baddek
Ket mangtimon,
Kapanunutan a tiweng.

Sumaggaysa,
Dagiti pitik
Kas arimbangaw,
Pangen ni sayangguseng.

Agragut,
Dagiti nabaktawan a lagip
Kas nagpanawan,
Dagiti nakeltay a rissik.

Umagibas latta,
Apagapaman nga arasaas
Naruay a mangbikag,
Kadagiti dapan nga agtukiad.

Ta inadipen man,
Saludsod nga agsasallupang
Manggay-at kadi,
A mangtimon wenno mangpaldaang?

Padasen latta,
A gaw-aten dagiti raya
Makapurar a rimat,
Dagiti arapaap.

Ket buyogan,
Tarnaw ni kinapudno
Mamagtamed,
Langit dagiti darepdep.

Bay-am,
Ti lubong a mangaming
Kadagiti pagteng,
Nakaikarian a di magawidan.

Ket sarangtem,
Dagiti babak
Ken sarakem,
Ubbog dagiti ganuat.

Wen, kabalinam
Nga ikutan ti lubong
Tunggal maisaruag,
Daklis ti masakbayan.

Ket mangummong,
Dagiti maregmeg
Ken binukel,
Bin-i nga ik-ikutam.

Also submitted for Iluko.com Published Articles

Copyright to: Leofina Jane Galleta
All Rights Reserved. ©2008leofinajanegalleta
June 10, 2008

Aragaag

2008-06-08T00:09:00.000-07:00

Agallangogan ita
Dagiti balikas
Tulbek ti tanem
Nga inka nagpasagan.

Nagtulid dagiti pagteng
Ken lagip, a naimaldit
Kadagiti ladawan
Nga imbati’t tagainep.

Ummungen dagiti pul-oy
Naruay a sinamar
Tapno di mapagsina
Paraut dagiti tekken.

Agrusing dagiti ramut
A pinasantak paspasamak
Namagsanga't agnanayon
Tinallikudam nga arapaap.

Ket maurnong dagidi sagibo
A pinarusing dagiti saning-i
Karit manipud langit
Mangrukod iti nabati a kired.

Itan agminar
Dagiti anniniwan
Kas aragaag a tinagibi
Ti agnanayon ken masakbayan.

Masebseban ngata
Dagiti linnaaw ti rissik
Aliaw nga in-inawen
Agpangaddua a kaungam?

No bilang matungday
Dagiti putar a samiweng
Saan a kas pannusa a dung-aw
A manglemmes ti puso ken kararuam.

Bay-am ti panawen
A mangyetnag ti pangngeddeng
Nga ituyang,
Ti langit a pagrukbabam.

Urayem a lumtuad
Naruay nga aragaag
Manipud aglukat
A tawa’t pannakaawat.

Copyright by: Leofina Jane Galleta
©2008leofinajanegalleta

Links:
Iluko.com Published Articles

PANAGAPIT

2008-06-01T23:47:00.000-07:00

Note: Nanumo a sagutko kadagiti naanus a mangtartarabay, ken inspirasyonko (iti amin a wagas), iti innak panangtakuat iti nangayed a lubong iti literatura...

PANAGAPIT

Matmatam ita,
Kinalangto dagiti nabiag
Ken nagrusing a binukel
Intukitmo, kadagidi
Gumawgawawa a rengat, rurog
Nga mbati't nadawel a tikag.

In-inut a nagbiag,
Dagidi ubbog a naulila
Gapu’t pannakalmes
Dagiti ritmo ken balikas
Nga immameg,
Ti mangum-umsi nga isem
Iti agmatuon.

Wen,
Nagmulaka't arapaap
Kadagiti kinelleng a gangannaet
Ket tinagibim,
Dagiti dawa numanpay ammom,
Saanto a sika't agapit
Ken mangtagikua,
Iti nalabon a masakbayan.

Tinaripatom,babaen
iti di managimbubukod nga ayat
Kas ganagan,
Nangbiag dagiti busel
Ket nangsungrod,
Gil-ayab ni essem a nangparegta
Kinasaldet a nangrubrob
Panangsarak iti gameng
Manipud lansad
Karissabong a kaunggan.

Iruknoy ita,
Dagiti tinaripatom a kinelleng
Ket awatem koma,
Dagiti linabag, balikas
A nagkawes kinanumo
Nupay agubbog,
Manipud kaungan ti puso.
Wen,agkurang ti rimat
Mairuknoy a balikas,sagut a ladawan
Panagyaman impaaymo a saranay
Ket dinto makaatar, iti kinangayed
Sirnaat nga ipapaay,
Kaaddam iti sibay.

Copyright: Leofina Jane Galleta
All rights Reserved. ©leofinajanegalleta

OTHER SITEs FOR THIS ARTICLE:

ILUKO.COM ARTICLES
LAKASA A TAWID

RITMO

2008-05-31T03:54:00.000-07:00

Kas kadagiti narukod
Battaway,
Iti nagbaetan
iti ilelennek
Ken isisingising
Ti init.
Babaen,
iti panagdanggay
Ritmo,anges
Ti langit ken daga.
Adda panawen
Pannakakullaap;
Pingping ti tangatang
A mangipaidam
Lawag,ket matikaw
Dagiti baddek
Mangparnuay talimpungaw.
Ngem dinto pulos
Kabaelan a baluden
Manayon a bitek
Ti panawen;
Ket mawaknitanto,
Tangatang nga inukom
Nabengbeng a panes.
Siiliwto,
A sumirip
Dagiti raya
A mangiyabrasa,
Talinaay
Ken namnama.

Copyright: Leofina Jane Galleta
All Rights Reserved.(c)2008leofinajanegalleta

UNNOY

2008-04-26T04:11:00.000-07:00

Agunnoy,
Dagiti pitik
Ritmo a biagen
Dagiti darikmat
A danggayan ragutok;
Anges, manipud dissuor
Iti kaungam.

Tiliwen
Dagiti taldiap
Naumbi nga abrasa
Kas pammakada,
Ti sumina a malem
Imnas a nangkayaw
Iti kararuam.

Ket lumtuad,
Dagiti samiweng
Agrusing, kadagiti baet
Linabag ni tagainep;
Naitalimeng a paraiso
Iti likudan,
Dagiti nabiag nga isem.

Iti panagrikep,
Dagiti tawa't kararuam
Maigiddato met, pannakalukat
Dagiti ruangan,
Iti paraiso a pagbibiagan
Dagiti sennaay a manglittup
Kadagiti naipaidam a darikmat.

Copyright: Leofina Jane G. Galleta
All Rights Reserved.(c)2008leofinajanegalleta

PANAGTABON

2008-04-12T22:43:00.000-07:00

Mangrugin a maiwayat dagiti addang
Mangipatungpal naisangsangayan a ritwal
Mamagkamet lubong tapno maipasngay
Linabag dagiti balikas, gameng nga ik-ikutam.

Itunda’t ayos dagiti baresbes
Pumsuak manipud lansad dagiti ubbog
Pagbiagan pannakaawat a mangparut
Puris, anniniwan; imbakbaklaymo a kalman.

Palubosam pammakada a danapeg
Dagiti kallautang a lagip, batibat ket ammangaw
Tinagibi’t rungsot, dawel dagiti dangadang
Rurog dagiti karit, kalman a pinarukmam.

Agur-uray, wayawaya a naibudi
Kadagiti tagainep, nailibay nga ulimek
Linglingay bugbugtong a padeppa
Ladawan a nangpanday,agdama ken masakbayam.

Bay-am ngarud dagiti allangogan
A kumuyog panagtabon a matmatmatam
Awatem kadin pammakada a taldiap
Mangwaknit tangatang, lubong a pagbibiagam.

Wen, itulnogmo itan, anaraar dagiti lagip
Adda dagiti tugot, ladawan, batonlagip
Tumpuarto’t balikas ken ritmo kadagiti parapo
Kas dara nga agtaeng kadagiti urat, lansad kinataom.

Copyright: Leofina Jane G. Galleta
All rights Reserved.©2008leofinajanegalleta

LAGIP

2008-01-15T03:10:00.000-08:00

Pulos a dinto agrupsa,
Dagiti tanda, inka intuyang a mangitunda;
Dissuor a pakasarakan kadagiti linabag
Lagip; inaywanan dagiti darikmat tapno di agkupas.

Innummong dagiti ayos,
Aweng dagiti garakgak iti panawen a panaglang-ay;
Mangngegam to latta, kadagiti arasaas dagiti pay-as
Taeng a nangtagibi; iti agtutubo a kararuam.

Ilukipto ti langit,
Tunggal gay-atem nga ukagen dagiti pinanid;
Ipatuldo’t gagar, inkanto panangtaliaw kadagiti naimaldit
Madadaanto’t law-ang ti punganay a mangipasirip.

Ket inton sumangbay,
Gundaway a mamagrusing naitabonen a lagip
Sarakem to laeng; tulbek a manglukat, dita nakem a naitukit
Intalimeng ti namnama a nangtarabay; panawen ti panagladingit.

Naikitikit kadagiti bato,
Mangappupo iti biag; lansad ti dissuor
Lakasa dagiti pagteng a naabel; naipempen,
Manayon a mangbiag; anniniwan, nabiag nga isem.

Wen, patinayon a naikur-it
Iti pakabuklan; dissuor nga ayuyang
Nakamatmat panaglupos, panagbukar ti kararuam
Agserbi a taeng; lagip mo a dinto agkupas.

©2008january15leofinajanegalleta
//18:56:58

Link:
PAGES OF JANUARY

BINUKEL

2008-01-15T03:03:00.000-08:00

Matmatam dagiti binukel
Maregmeg dagiti tagainep a mangidaldalan;
Awan sarday a mangat-atur tunggal baddek ken addang
Mangtimon, manglinteg; tiweng a kapanunutan.

Sumaggaysa itan dagiti pitik,
Umarimbangaw a pangen dagiti sayangguseng;
Agragut a mangsulnit kadagiti nabaktawan a lagip,
Nagpanawan dagiti nakeltay a rissik.

Umagibas latta't arasaas nga apagapaman,
Naruay a mangbikag kadagiti agtukiad a dapan;
Inadipen manen,saludsod nga agsasallupang
Manggay-at kadi a a mangtimon wenno mangpaldaang?

Padasen a gaw-aten dagiti ramramay
Lubong, mangtataming; pagteng, nakaikarian
Sarangten kadi, isekkad dagiti takiag
Wenno saraken, ubbog dagiti ganuat?

Wen, kabalinam a sallukuban ket ikutan
Lubong a maibalud tunggal pannakaisaruag;
Maummong maregmeg, mangbukel masakbayan
Kas binukel dagiti bin-i nga inka ik-ikutan.

©2008january12leofinajanegalleta
//22:15:54

Links:
PAGES OF JANUARY

GUNDAWAY

2008-01-09T05:50:00.000-08:00

Maimatangan kadagiti sennaay,
Inka ipatpatayab a mangituktukit;
Kadagiti busel, tinaripato’t kaunggam
Ramut dagiti aragaag ti napalabas.

Inulila’t ipapanaw dagiti parbangon,
Pammakada’t sardam a pakamatmatan
Maakas a kas angep, kinaawan gaway
Nanguyos, nangparmek iti regta’t kararuam.

Umagibas latta tunggal panagtuglep,
Regta, idurduron dagiti rumkuas a danapeg
Ibelbel-a dagiti sumaggayasan nga anges,
Padasen a mangrubrob nalamiis a temtem.

Agpangadua man dagiti addang
Adda amak a mangsinga’t agin-inana a kappia
Bayat pannakaubon dagiti gagem
Pagsisilpuen; babaen iti panait ti agdama.

Andingay met ti itden ti langit,
Babaen iti ladawan, bukbuklen, pagsasaipen
Pammati ken panagayat, mamagtipkel ngarud koma
Iti laksid naibaet, naruay a lapped ken pangta.

Wen, bay-am kadi man laeng,
Panaglangnguak ti agpagunggan nga aliaw
Palubusam nga agwayas, agdakiwas;
Iburay dagiti gundaway; talged, isu’t mangwanwanawan.

Kadagiti kanito a pumakadan ti kalman;
Pasungadam, ti sumangbay a gundaway,
Bareng amak a nangbalud kadagiti dakulap
Itugot dagiti lumabas a layap iti nasapa a sardam.

©2008january09leofinajanegalleta
//21:33:09

PANANGSARAK

2008-01-09T05:46:00.000-08:00

Agdaliasat,
Tubbog dagiti ubbog
Ket agturong kadagiti lansad,
Yuyeng dagiti dissuor.

Inka kad saraken,
Taeng dagiti arinedned
Iti umno a panawen,
Agragut, rumkuas manen.

Di agsarday panagtedted
Aruyot; pagay-ayusan kinaregget,
Ubbog a pagsakduan iti naynay a kired
Panagibtur, kinatibker , kasla ramut a nasiken.

Dika bumdeng, intuodem,
Mangnibinibi a sudi, ayat a sagut kas bin-i
Babaen naannayas pannakasuot
Tunggal gay-aten ti panagsukisok.

Wen, imutektekam,
Pudno a maris dagiti anniniwan
Pinaglumen dagiti pagsilawan a naiddepan
Narayray a rimat dagiti pagilasinan.

Iti tangatang, sawsawarem manen,
Anniniwan; bareng maibaskag kadagiti ulep,
Manipud rengngat kadagiti kinelleng
Imbati a lagip, naulpit a kalgaw ngem itan naglumen.

©2008january07leofinajanegalleta
// 18:56:10

ALLON

2008-01-04T05:54:00.000-08:00

Itan a sumangbay, paltiing; agkakamakam
Kas kadagit allon, agragut a makagteng iti kadaratan
Naumbi a palong; mailiwan da man
A matmatmatan met, ti sellag a sardam.

Adda kadi ngata nga imet dagiti takkiag;
Mangipalpallayog, main-inaw a karasakas
Kalasag a mangparmek; amak, panagtukkiad
Gubbuayan ti kired, apagapaman nga addang.

Naited ngata kenka, bileg a mangted linak ,
Wenno naipaltiing, agam-ampayag a tumatayab
Timon a mangtengngel, dalluyon a rumkuas,
Allon, agdudupudop; di pulos mabannogan.

Panawanto ngata dagiti daranuror,
Dalluyon, rumagragot; a mangiduruduron
Kadagiti agtuktukiad, agsarsarimadeng a gandat
Mangukom kad ngata kadagiti mangpadas?

Adda ka iti baet naimuntar a peggad,
Manggandat a mangballasiw nadawel a taaw,
Taeng dagiti naruay a pagteng, sidadaaan
Mangsuot ti tibker, ungto di pulos maripar.

Ngem adda ketdi latta, sennaay nga isangbay
Saludsod, panagamak; pangngarig, nangparnuay
Mangkibkibor talinaay kadagiti rukib ken teppang
Kas iti kadilian a taeng dagiti dayyeng ti kaunggam.

©2008january04leofinajanegalleta
//21:29:36

DESDES

2007-12-30T20:09:00.000-08:00

Iti tangatang,
Ipasirip dagiti ulep
Ladawan; gappuanan dagiti dakulap
Inka inkaradap, sagut iti sakaanan.

Kadagiti langalang,
Nabati’t anniniwan dagiti saning-i
Kasta met dagiti tedted ti lagip
Dinto aglumen, naibenggas kadagiti gurit.

Kadagiti lansad dagiti dissuor,
Naimaldit dagiti lagip
A nangsuot tibker ken simbeng
Nakem kadi ket nalap-it.

Masarakan kadagiti pagpikuran
Dagiti ared-ed panawen a pannakatikaw
Maigapu’t agsasallupang nga arasaas
Pul-oy ti waig ken amian.

Kadagiti ramut a masarakan
Siken ken kired a nangdalagan
Nangaywan pannakaawat, nangiwanwan
Nangipatuldo’t pagilasinan; desdes ti umno a dalan.

©31december2007leofinajanegalleta
//11:29:58

MASAKBAYAN

2007-12-30T20:08:00.000-08:00

Bayat inka panagtamed,
Kadagiti nasapa a sardam;
A kas inka isasaklang,
Mangisagut panagyaman.

Naipaay a gundaway;
Sagut, regta, naindaklan
Inikkam ti kaipapanan
Tunggal naglabas nga aldaw.

Iti ngarud ilelennek,
Panagtabon iti malem
Baro a karit, namnama;
A sarangten ti kararua.

Isangbay umay a tawen;
Iti panunot,im-impem
Panawen a maisangrat,
Panangator iti biddut .

Itan, inka iyinana,
Kaunggam a nabannogan;
Bay-am a mapalag-an,
Ukarkaren man ti sardam.

Dagensen mo a naurnong,
Napulkukan a karuruam;
Punuen to’t Langit ti ayat
A liwliwa’t masakbayan.

©31december2007leofinajanegalleta
//11:25:06

PANAGRIKEP

2007-12-30T20:05:00.000-08:00

Maikupin manen dagiti pinanid;
Ket magibusan manen dagiti pangted
Babaen kadagiti maipalok a teddek
Pagilasinan; nagpanawan ti panawen.

Ita ti gundaway a panagiringpas
Pananglagip, panagtaliaw kadagiti namunganayan
Agtulid dagiti darikmat, agsubli nga aglayag
Tapno inka agpakada kadagiti aldaw a naglabas.

Inka ngarud panurnuren, uray iti apagbiit,
Tanap, inka dinaliasat; ken pay-as a binallasiw
Agur-uray ita kenka, sagibo dagiti lagip
Nupay inka nalikudan, tinaripato ti langit.

Naibati kadagiti tambak nga inka naglablabasan;
Maninawam a tugot, bayat panagdaldaliasat
Agnanayon da a lagip; dagiti umno ken biddut
Iti inka panangbukel kadagiti burburtia a sagut.

Nabiag latta a pumpumsuak, ubbog iti langlangalang
Nangpedped ti pannakawaw, a nariknam iti dalan,
Dikanto met kalipatan dagiti lungog; derraas
Sakbay iti panagtabon, lagipem kad amin idan.

Wen, addanto pay panawen, inka panagaripapa,
Panangsangal balbalikas; gameng isaklang mo ida
Ladawan, nakaimalditan; nagapuanan a makita
Bareng umisem ti langit, panagkirep ti agdama.

©30december2007leofinajanegalleta
// 23:54:45

ITA A SARDAM

2007-12-28T22:30:00.000-08:00

Umno ngata nga ipaduyakyak
Babaen kadagiti umbi’t arasaas;
Ikalkalbit dagiti bulbulong a naimuntar iti dalan
Ray-aw ken liwliwa iti langlangalang.

Sinibugan dagiti ulep iti sardam,
Binukel dagiti bin-i, inka imparangkap
Pagilasinan, pammasingked inka man anninawan
Pammalubos ti langit kadagiti main-inaw nga addang.

Matmatam a maibaskag,
Ladawan a nakaimalditan dagiti nabiag a bitek
Agragut itan a rumkuas ,
Manipud taeng; pagdamilian a nakaparsuaan.

Pangiturongan ngata’t arapaap,
Babaen kadagit arimpadek a mangwanwanawan;
Kadagiti ladawan a bukbuklen, tarigagay a rumkuas
Kadagiti urat kapanunutan a di mabannogan.

Bay-am nga imaldit dagiti layap
Babaen kadagiti ulep a mangiladawan
Burbutia a naiyetnag, inka inallawat
Bukel a tinaripato dagiti oras a naglabas.

Ita a sardam, marubruban dagiti temtem
Panggapuan ti puyupoy a nangipug-aw
Alibungubong dagiti main-inaw a gagem
Nangparegta kadagiti agbugbugsot a karakua.

©28december2007leofinajanegalleta
// 22:40:25

PAGILASINAN

2007-12-28T22:28:00.000-08:00

Italtalukatik dagiti tarakitik
Parnuayen tunggal binukel ken tedted
Mangan-andingay a ritmo, kas man arimpadek
Samiweng a gappuanan inka idadateng.

Inkuyog mo’t anges, arasaas ti puyupoy
Mangtukay,mamagbukar; nailibay nga essem
Rangtay a mangitunda impasirip dagiti ulep
Kaikarian; agur-uray, iti ungto’t bullalayaw.

Namsek ita, napnuan segga; dagiti ur-urat a namsek
Kadagiti agsasallupang, aglalabbet a danapeg
Karasakas a gappuanan natarimbangon a ganaygay
Mailiwan a mangpasangbay, main-inaw a gundaway.

Itan, adda regta kadagiti baddek ken lung-ay
Dapan a maganatan; napnuan da man ti ganaygay
Namnama a sarukod, panagdaliasat a naruay
Mangsarak ti naipaltiing; isu’t gameng masakbayan.

Wen, mailiwan man; pakinakem a mangpasungad
Kanito a panaglukat dagiti tawa ti tangatang
Mangipasimudaag, kanito a nainggasatan
Dana, innak pangrugianan; pakasarakan panungpalan.

Bareng umno ken umiso dagiti ipaspasimudaag
Maris ti uges a nangbukel; simbolo a pagilasinan
Paripirip iti langit; bayakabak, mangiyarasaas,
Mangsibsibog; dardarepdep a tagtagibien ti kaunggan.

©28december2007leofinajanegalleta
//16:25:15

ADDANG

2007-12-25T19:56:00.000-08:00

Makaanay ngata,
Tadem ti panawen a mangwarwar
Kawar dagiti lagip; karsel nakaipupukan
Kararua ken nakem nga ik-ikutam?

Ilemmeng ngata,
Dagiti arrap a darikmat, sagut a namnama
Iparangarang rimat, magangtan a bombilya
Tunggal maakas ti telon; entablado’t parparmata?

Ikayab ngata,
Nadawel nga angin dagiti itta
Naibudi; kadagiti binukel ti dawa a naipenpem
Sarusar ti kaunggam; pabulusam ngata?

Wayawayaam metten,
Nairut a kapet kadagiti abaga’t panagbuteng
Rabii a kidem, pinilim a lasaten
Kullayaw kaunggam; kenka’t nangadipen.

Bareng pasangbayem,
Arbis a mangbisibis kadagiti rengngat
Nagtaengan dagiti anay; panagamak
Inka panangpadas, mangsaranget kadagiti ublag.

Ruk-atam kadin ala,
Dagiti lanut a nagbekkes kadagiti saka;
Iyukrad mon dagiti dakulap a mangallawat pigsa
Irusat mon dagiti addang, mangitunda’t panungpalan.

©25december2007leofinajanegalleta
// 2:03p.m.

AMMANGAW

2007-12-25T19:55:00.000-08:00

Inkawes mo,
Panagsagaba; lagip a nagpanawan
Rurog a naikitikit kadagiti kalman
Pannakapaay; karit a nagsammakedam.

Insarukod mo dagiti ublag a naimuntar
Kadagiti desdes inka naglasatan
Inkallugong mo’t danag ken aliaw
Panawen nga inka nasipngetan iti langalang.

Agmaymaysa ka,
Mangas-asak ti lubong pinilim a pagtaengan
Nupay namsek dagiti suli; kararua nga agkatangkatang
Kas met kadi kenka a naibalud lubong iti kaunggam?

Wen, makapleng dagiti ariangga,
Musika a parnuayen dagiti garakgak,
Nasam-it ngata, panagtamed a parparawpaw
Dagit abrasa nga ubbaw, awanan kaipapanan?

Nalabon dagiti isem ken paggaak
Panawen ragragsak nga awanan anag
Saan mo man a marikna, sam-it balligi’t parmata
Ta agmaymaysa ka, iti tengga’t taaw ti ammangaw.

©25december2007leofinajanegalleta
// 1: 57 p.m

DAWAT

2007-12-25T19:51:00.001-08:00

Bay-am a sumagepsep,
Ling-et ti langit; mamagkamet
Rengngat dagiti aray ti namnama;
Naisangrat a mangtagibi iti agdama.

Imuriam dagiti binukel,
Napili a daton; ket indayonen dagiti takkiag,
Nailatang a mangdalagan kadagiti bin-i;
Sapata ti punganay, suray, dagiti agsapa.

Bay-am dagiti gurit ti tagainep,
A lintegen dagiti dakulap ti agdama;
Ket tamingen ti panawen, maisagsagana a bangkag
Agbalin a taeng bunubon a daton iti masakbayan.

Palubusam ketdi,
Isem ti langit; mamagbukar kadagiti busel
Babaen kadagiti agek, binukel ti linnaaw
Kadagiti agsapa; ganagan a naituyang.

Palugudam a mapasantak,
Dagiti ramut ken sanga tapnon rumangpaya;
Ket urayem nga agbukar, dagiti sabong a pakauna
Mangiparipirip; paparmataem, nalabon a bunga.

©25december2007leofinajanegalleta
// 1:50 p. m.

DAWAT

2007-12-25T19:51:00.000-08:00

IDADATAG

2007-12-24T05:21:00.000-08:00

Agdanggay,
Bitek, segga ken sennaay
Pasingkedam ngata,
Iruknoy ko, kas pagyaman?

Itan, agsasallupang,
Agam-ampayag a rikna;
Sakbay nga innak sumarang,
Idadatag dita sadya.

Adda kebba a narikna
Tunggal baddek dagiti dapan;
Manipud iti ruangan, agsarimadengak man
Agpangadua dagiti addang.

Sagut nga innak idatag,
Pannakaipasngay ti Ayat;
Nanumo ken nakurapay
Balligi ken nagkamtudak.

Gameng, namnama, bendisyon,
Inyetnag Mo amin ida;
Bugas ken bunga’t u-unnoy
Innak isagut met Kenka.

Adtoyak, agaripapa
Mangiruknoy sakaanam;
Kambas; naruay a ladawan
Gapanuan a nairingpas.

©24december2007leofinajanegalleta
//8:31pm

KULLUONG

2007-12-24T05:20:00.000-08:00

Padasek man laeng; bareng masarakan
Sungbat ti burburtia, maris, kaipapanan
Langit; mangipakita pudno a ladawan
Dagiti naituyang a nakaikarian.

Naikawes kenka ti kinakurapay
Daytoy man ti innak naimutektekan
Kas man napaidaman iti kinadayag
Sukog; naiparabur iti pakabuklan.

Iti baet kinanumo, namsek ti kaipapanan
Pudno a maysa ka a naingasatan;
Kas takiag, nangilili; naruay a saranay
Iti gameng ti langit; salakan a kamang.

Naimutektekak; impasirip ti law-ang
Babaen ti sungbat a di naipadam
Kulluong iti belen, innak matmatmatan,
Simbolo ti ayat; pakaisalakanan.

WEn pudno a saan a makita’t kinadayag
Babaen ti kawes; wenno balikas man
Aramid; gapuanan ti mangiladawan
Panagsapul dana a nakaikarian.

Inyarasaas manen pul-oy ken salemsem
Ita ti panawen, tapno tingitingen
Pannakaamiris no umno met laeng
Naituding a dalan, nairugin a suroten.

©24december2007leofinajanegalleta
//1:07 p.m

SIAM A PARBANGON

2007-12-20T22:35:00.000-08:00

Taltaluntunek , dana a paglasatan
Mangitunda’t disso; kulluong, pakasarakan
Gameng, panagayat; sagut, pammakawan
Iti siam a parbangon, inka pasungadan.

Parabur a sagut; bugas ti un-unnoy
Wen, innak saraken iti siam a parbangon;
Saning-i ken dung-aw; ikubuar barukong
Babak, kinakapsut, nanumo a daton.

Palugudan ngata, nadayag a langit
Gagem, panagibtur; dawat ken saning-i,
Iti siam a parbangon, itukit a bin-i
Isagut nga ayat ken panagbabawi.

Iti siam a parbangon, innak ngad saraken
Balitok a gameng, inka intalimeng
Kadagiti lagip, limmabas a panawen
Kamtud,panagpulkok; innak ngad aturen.

Inka iladawan pudno a kinabaknang,
Saan a maited, lubong a pagbibiagan;
Masarakan laeng iti lansad ti kaunggan
Talinaay ti nakem; sagut a nailangitan.

©21december2007leofinajanegalleta
11:55 am

BEDDENG KEN NAGKURUSAN

2007-12-20T22:34:00.000-08:00

Iti kangitingit,rabii a kaltaang
Binalkot ti ulimek ken segga, a sardam
Saludsod ken aliaw, agar-ari’t kaunggan
Sika kadi’t sungbat, intulod ti amian?

Adtoyak ngad ita, ulila a kararua
Nadaripespesak, amak ken namnama
Sika kadi't lawag,itan mangiwanwan,
Bagnus, mangitunda iti nakaikarian?

Imet mo kad ngata, pataw a salakan
Mangalaw malmalmes, rikna a nabannogan
nakem nga agragut itan a mangsarak,
Beddeng, nagkurusan; taeng ti arapaap.

Timpuar ka iti baet dagiti naruay a rengngat,
Rurog, nagpanawan ti narungsot a tikag,
Sika ti impasngay, nainaw a darikmat
Bunga ti nagbulig nga asug ken garakgak.

Ikamang ko ngarud, barbareng man laeng
Ipatuldo't sungbat, lumabas a panawen
Babaen arasaas nangbalkot a salemsem
Dana ken desdes, umno a lasaten.

Masarakan ngatan,sapsapulen a sungbat
kadagiti bituen ken lumabas a layap
Kataktakunaynay, naulimek a sardam
Iti panangsapul maiyannatup nga addang.

Diakto pulos gamden ti agsarimadeng,
Inak panangsarak,umiso a desdes
Kadagiti baaet, beddeng ken nagkurusan
Naimuntar a dalan iti masanguanan.

©21december2007leofinajanegalleta
11:49am

KINELLENG

2007-12-20T22:30:00.000-08:00

Addaka manen a mangkarkaradap
Kadagiti desdes a naimuntar,
Mangitunda kadagiti lungog ken pay-as
Kinelleng a pagbiagan dagiti arapaap.

Bay-am ngarud ket palubosam;
Dagiti binukel a tagibien, tedted ti linnaaw
Panagayat ti daga, ipasayak dagiti sangka
Danggayan puyupoy, isangbay ti agsapa.

Nupay akikid,taltaluntonem a tambak
Marka a pagilasinan kadagiti nagbeddengan
Mangrangtay kadagiti gagem iti pagbunubonan
Bisibisan ti langit nalabon a bayakabak.

Iwarasmo kadin bin-i't masakbayan
Kadagiti aray sidadaan a mangallawat,
Mangaywan, binukel nga inka ipalladaw
Ayat a naabel; impasngay kaunggam.

Wen, sika ti kinelleng; naikari a pagbiagan
Arapaap a sagut ti langit a naruay
Saanka a bumdeng, dimo kad ipaidam
Biagem, pasantakem; tapno inka iparangkap.

©16december2007leofinajanegalleta
12:29pm

SEGGA

2007-12-20T22:27:00.000-08:00

Di agsarday,
Tarigagay a sumangbay
Iparparangarang dagiti ladawan
Maimatangan tunggal panagtulid ti basikaw.

Dumteng itan,
Bara ti arakup; aributed ti linnaaw
Mangpasantak; mangsibog
Agbugbugsot a panunot.

Kas iti panagdaliasat,
Dagiti di magawidan a darikmat
Sang-aw nga ipug-aw mangted biag
Mangimaldit kadagiti tugot a dinto mapunas.

Gandaten latta,
Palangtuen ken sibugan
Bin-I ken busel a mangiburay
Mangpagungar, panunot a nailibay.

Nabiag manen,
Dagiti ubbog a mangikubbuar
Kadagiti linabag a sagut ti sardam
A mangpasayak kadagiti kinelleng ti arapaap.

©13december2007leofinajanegalleta
10:05am

APLAYA

2007-12-20T22:25:00.000-08:00

Natinggaw dagiti main-inaw
Arasaas; dalluyon nga umarararaw
Umag-agek, pulos a di mabannogan
Kadagiti rukib, natingra a kadilian.

Naannayas, aweng dagiti arimpadek
Parnuayen a ritmo dagiti baddek
Bayat panagpadas a mangrukod
Aplaya a rangtay dagiti sungbat ken saludsod.

Nupay adda saning-i’t naibudi
Kadagiti lung-ay, addang a napnuan sudi
Nalinteg, takap dagiti tugot
Imalmaldit; dagiti sennaay nga inka imbulos

Kas kinamaris dagiti panagtabon
Mangyaw-awan kinakawaw gapu’t ipapanaw
Daras a pugasen rumusing nga aligaga
Mangandingay; mangay-ayo iti agpauyo a malem.

Awan patingga na a talinaay,
Iyar-arasaas tunggal isasangbay
Naumbi nga agek kadagiti dapan
Itunda’t manggargari a puyupoy ti amian.

Wen, kukuam dagiti kanito,
Tunggal panagwaywayas a mangpadas
Mangarakup iti bugas dagiti arapaap
Gagem a naitalimeng, agbibiag iti kaunggam.

©09december2007leofinajanegalleta

KAIPAPANAN

2007-12-20T22:22:00.000-08:00

Naumbi a tadek,
Isu’t kaibatugan ken kaipapanan;
Sumirip nga isem, awis ti salemsem
Isangbay ti amian.

Kas man aragaag,
Darepdep a naruay dagiti linabag;
Ti maripiriprip,
Bukel tagainep, ti apagdarikmat.

Tunggal panagsabat
Kadagiti desdes, naynay a pagpagnaan
Dagiti naibalud, gagem ti kaunggan
Kas man maruk-atan.

Numanpay naumbi,
Dagiti panawen, sagut a darikmat
Kas man papaayat; nawatil nga isem,
Panawen ken langit a makaimatang.

Ta maripripar man,
Rimat, anaraar lumabas a layap
Mangisangbay lagip,
Kayaw ken garakgak ti apagdarikmat.

©08december2007leofinajanegalleta
//11:18 pm

TAGAINEP

2007-12-05T19:41:00.000-08:00

KAMBAS

2007-12-05T19:37:00.000-08:00

Iti Paraiso,
Disso’t pagtaengan, nakaimalditan
Lagip a nangputar,
sam-it ti samiweng ibelbel-a’t kaunggan.

Umapay dagiti lagip,
Panawen a natinggaw dagidi pulikkaaw;
Tunggal maipusing, mailinged iti imatang
Bin-I , rumusrusing; iyal-alikakam.

Nalawag latta,
Lagip dagiti pinanid, itan naimaldit;
Dagidi darikmat a panagdaliasat
Desdes ti panawen, sika ti nangsilaw.

Dagidi kanito,
Inka panangtubngar, panangabel kadagiti wagas
Nangpatibker ketdi,
Sukog ti ladawan, naganus nga arapaap.

Tinaripatom,
Babaen pammateg, anus, kinadungngo
Binukel ken busel, kararua; pammati
Inka tinagibi, babaen ti ayat mo a napnuan sudi.

Bay-am ngarud ita,
Iyabrasak kenka ladawan ti agdama
Matmatam man kadi, kambas a napartuat
Panawen ken biag mo’t, nangimaldit a tinta.

©8december2007leofinajanegalleta
//11:13pm

[ linabag a pagyaman kadagiti dakulap a nangtaripato kaniak... //ljgg }

PARIPIRIP

2007-12-04T19:17:00.000-08:00

Sumirip-sirip,
Isem, apagbingngi
Numanpay dung-aw
Iparparipirip dagiti talukatik.

Kadagiti anges,
Iyesngaw ti law-ang; pakaibuyugan
Naruay a tanamitim, sennaay kadi
Wenno panagyaman a naibudi?

Tunggal kirem a mangtiped,
Matengtengngel dagiti saibbek
Ipasngay dagiti linabag,
Lagip, intalimeng ti panawen a limmabas.

Saan a mailemmeng,
Babaen ti aweng dagiti garakgak;
Dinto maitanem, wenno mailemmeng
Kinapudno a nawaknitan.

©05december2007leofinajanegalleta
//10:32 pm

PANNARABAY

2007-12-04T19:15:00.000-08:00

Itan naidiaya,
Pettat a simmangbay,sagut kadi ngata
Kadagiti dakulap,
Naiparbeng kadi, allawaten ita?

Bareng kad maripar,
Ngayed,kinatarnaw ;
Ayat a nagbukar,
Sagut; pannarabay.

Kadagiti dayyeng,
Nagbiag man ti gagem,babaen samiweng
Nakem a naimayeng,
Itan, agrimrimat; naitukit nga arapaap.

Awanen sabali,
Nangtarabay a naruay,
Nangsibog, nangpasayak,
Kadagiti uggot, itan agrusing dan.

Dagiti sennaay, maruk-atan da man,
Tunggal umagibas, nangayed a rimat
Maimutektekan napnuan panagayat,
Ti naimpapusuan, pannarabay a naruay.

©5december2007leofinajanegalleta
//10:26PM

WAYAWAYA

2007-12-03T20:22:00.000-08:00

Ita a kanito,
Insagut ti langit ti pannakawaswas
Kawar a nangbekkes takkiag ken dakulap
Nangted karit; aliaw a nagtaeng iti kaunggan.

Naiwaksi itan,
Nabengbeng a telon; amak nawaknitan
Nupay nagitured di pulos limdaang
Isem a narimat, naynayen a lumtuad.

Itan, nawaknitan
Narimat ti langit a kaibatugan;
Inyetnag mo’t ayat,
A dinto agkupas ingga’t kaano man.

Ragsak ken namnama,
Lansad barukong ko, agar-ari ita
A kas iti rimat,
Bisibis linnaaw, itden ti agsapa.

Iruknoy ko ngarud,
Iti sakaanam amin a parabur,
Naundayan a panawen, pannarabay mo
Naruay man a sagut.

©4december2007leofinajanegalleta

NAMNAMA

2007-11-30T21:16:00.000-08:00

Bay-am;
Bulusam ti ayat, isu’t manglapunos
Puso a malmalmes,
Gapu't gura, panagtutuok.

Tarnaw;
Kinadalus koma’t umukuok,
Runawen ti langit
Kawar kinadangkok.

Bareng mawaknitan,
Kullaap panunot, isu’t naikumot
Imbati’t darikmat;
Simangbay a nangsuot.

Sungrudam ketdi,
Temtem a manglawag dalan ti balligi;
Mangparmek ti sipnget,
Iti lansad ti nakem, agar-ari pay laeng.

Wayawaya koma,
Isangbay dagiti nasalemsem nga agsapa
Mangpunas ti liday,
Panawen ti ayat, pammati, namnama.

©01december2007leofinajanegalleta
//10:34 AM

DISYEMBRE...

2007-11-30T21:15:00.000-08:00

Iyabrasam ita,
Salemsem a mangrubrob temtem ti kararua
Mangbiag kadagiti ramut,
Rumusrusing, agsasabong nga arapaap.

Nupay angep,
Nangbalkot ti sumangbay ita nga agsapa;
Naruay met ti rimat,
Naiyarkos a namnama.

Iyaplaw ti salemsem,
Indayas ti linnaaw, talna’t pakinakem;
Bareng allawaten,
Umiso a gagem koma ti agtaeng.

Pasungadam latta,
Lawag, kinadayag a sumangbay ita;
Iyetnag ti langit kas sagut a naruay
Iti amin a parsua.

Iti idadateng,
Naruay nga agsapa, namsek ti namnama;
Ayat, talingengen, maiyarakup latta,
Sagut ti mannubot, lubong nga agdama.

©2007leofinajanegalleta
//10:29 AM

SADAG...

2007-11-29T19:23:00.001-08:00

Naundayen a panawen,
Darikmat, mangbekbekkes;
Babaen kadagiti linabag,
Aweng, balbalikas; naabel a kas kararag.

Napateg dagiti darikmat,
Mangdaydayas kadagiti arapaap
Mangpunas; lagip dagiti piglat
Kagay a manglapped, salemsem ti amian.

Natibker ketdi dagiti teddek,
Nagbalin a taeng, tugot ti panawen
Nakaimalditan, pannubok a naruay
Arigengen; nangpadas, mangparmek iti suray.

Simmangbay ka a sadag,
Nangsapuyot nakem, kinigtot ti aliaw;
Talinaay, impaay; nagsadagan a takkiag
Timon, nangiturong; nagted simbeng, lawag.

©30November2007leofinajanegalleta
// 10:40 AM

SALUDSOD...

2007-11-29T19:18:00.000-08:00

Tallikudam kadi,
Inruknoy ti agsapa; narimat a kari
Mangwaknit ridep; parimrim ti langit
Mangandingay, mangbiag; isem a nasudi?

Dika bumdeng,
Mangallawat ti sagut, regta’t pakinakem
In-inawen tunggal darikmat iti naundayen a panawen
In-inut a sinangal, paspasamak a nasken.

Nabungon ti rimat iti kinapudno,
Inurnong, impateg iruknoy a sagut
Parabor a naruay, gameng a balitok
Awatem a daton, puso ken panunot.

©30november2007leofinajanegalleta
// 10:34 AM

ANARAAR...

2007-11-28T18:38:00.000-08:00

Nailinged a ladawan,
Panangduadua't kaibatugan,
Sukog inka iparangarang;
Di man maimutektekan.

Anniniwan ti katukad,
Naipinta a ladawan;
Wangis, maris a mamatmatan,
Pangta kadi’t anniniwan?

In-inawen kaunggan,
Pangta kadi, makadangran?
Wenno amak ti marikna,
No iti lawag ket sumarang?

nadalus ngata dagiti gandat,
naibudi kadagidi isem ken garakgak?
wenno maysa a naiwawa,
kararua a gumawgawawa.

Abrasa ti panagayat,
Mangriing, panunot nailibay iti nabayag
Makita't sagut awan kaasping a kinadayag,
Insagut ti langit, sika laeng ti agikut ken mangpasantak.

©29november2007leofinajanegalleta
//10:05 AM

ARBIS

2007-11-28T18:33:00.000-08:00

Nupay nalag-an,
Naemma't arimpadek, inka isasangbay;
Di mailemmeng, kinadaeg, kinadayag,
Parabur ti langit a kupkupikopam.

Naruay dagiti ritmo ken aweng,
parparnuayen tunggal arimpadek;
Pakaipasngayan nalailo a samiweng,
Talinaay; manglapunos iti nakem.

Talingenngen; kenka, naikawes
mangukas, mangwarwar; naruay a saibbek
Kinasimbeng, ipaay tunggal agtinnag a tedted
Isu't kaipapanan inka ilalabas;liday ket maep-ep.

©29november2007leofinajanegalleta
//10:01 AM

BIN-I

2007-11-27T19:58:00.000-08:00

Iburay,
Tunggal isem a lumtaw
Segseggan, naynay a papasungadan
Dardarepdep a di maibuksilan.

Iparparipirip,
Nabiag a rimat dagiti arapaap
Ipaspasimudaag dagiti darikmat
Iti tunggal matiliw, parimrim ken kidmat..

Maimutektekan,
Kaipapanan a naitalimeng
Italtalukatik dagiti naisab-it a bitbituen
Buyugan, arasaas dagiti lumabas a layap.

Iti lukong barukong,
Mangrugin a maummong
Nagramut, mangrugin nga agsabong
Intukit ti darikmat, bukbukel ti arapaap.

Dika ngad bumdeng,
Padasem a gaw-isen
Intukit iti langit, gagem iti nakem
Sapulen a situtured, inkari ti panawen.

©28november2007leofinajanegalleta

GAPUANAN...

2007-11-27T19:57:00.000-08:00

Indengam ket timudem,
Arasaas dagiti aningaas
Parnuayen; ipugpug-aw
Rungsot, nakariing a nakaparsuaan.

Anagem, imutektekam,
Bunga’t gulib, kinadamsak
Insubad mo, impalak-am;
Pannaripato, inka tinallikudan.

Sagrapem itan, bales kinarungsot
Subad dagiti sugat nga inka insagut;
Taaw, kabakiran; indadanes, sinukisok
Agdung-aw ka kadin, parsua a narungsot?

©28november2007leofinajanegalleta

PADTO...

2007-11-24T05:55:00.000-08:00

Kas iti anaraar,
Pabelo a masegdan,
Agsaknap;
Lawag ti kinapudno.

Dinto mailemmeng,
Numanpay naitanem;
Piglat ken sanaang
Inlabasen iti kalman.

Dumteng to latta,
Panagsublit’t batonlagip
Numanpay linaksiden,
Awan tibker a pakinakem.

Sapulen to’t napagungar,
Naipusing a namnama,
Ungto dagiti pagteng
Inlingeden ti panawen.

©24november2007leofinajanegalleta

PANAGYAMAN...

2007-11-23T06:42:00.000-08:00

Naemma’t panaglayag,
Inruknoy a sagut, itan agam-ampayag;
Binuyugan dagiti gagem, agbibiag,
Agtaeng a tagtagibien, iti lukong ti kaunggan.

Itulod ti imatang,
Nakusnaw nga asuk, namumo man ti araraw;
Pammateg a naibudi, nasudi’t kinatarnaw
Bareng koma, masay-op mo, iti inda kaipapanan.

Agtedted dagiti lua,
Marubruban a pabelo, a buyugan iti pul-oy
Umdas ngatan a mangsalbar,
Mangted isem dita pusom

Wen, inka ngad met matmatan
Gandat ken kaipapanan;
sagut ko met kas pagyaman,
Insangbay mo a taklin, gameng a salakan.

©23november2007leofinajanegalleta

T A R N A W

2007-11-22T05:10:00.000-08:00

Maallingag ngata,
Maysa a sennaay a di maipeksa
Nasilawan kadi,
Kinapudno, agsapa’t insangbay na?

Insangbay,
Tumayatab a mangwanwanawan
Mangsalaknib,
Pakat ken pangta iti dalan.

Maris naiyawat nga abrasa,
Tagainep kadi laeng?
Inwaknit ti tangatang,
Naidatag iti imatang,

Kinapudno,
Kupkupikopan pakinakem ken panunot,
Indatag iti langit,
A kas sagut iti mannubbot.

©22november2007leofinajanegalleta

D A L L U Y O N

2007-11-22T04:12:00.000-08:00

Natinggaw,
Agallangugan a dalluyon,
Iti apagdarikmat,
Nagaw-is dagiti umam-ambing a panunot.

Sennaay,
Rumkuas tunggal umagibas
Titik ni panangilala, insalda
A kas sukat tingra ti parupa.

Saludsod, agam-ampayag;
manglimlimo kadi ngata?
Inur-uray, inka panangwaknit
Panangsagad; agalla-ala a pasagid

Mangnamnama,
Maiyabrasa koma’t maris;
Ngem no apay a nagbaw-ing
pudno kadi’t arasaas ti angin?

No pudno man a natarnaw,
Apay a tinallikudan,
Ruangan nga innak inuktan,
pulos a di man tinalliaw.

Sammaked ken salakan,
Langit a nakaimatang
Makakita’t kinatarnaw,
kinapudno ti kaunggan.

Salakan kararua dinto koma mabannogan,
Mangsapuyot, mangandingay;
Mangsalaknib pangta’t gagem
A mangdupir masakbayan.

©22november2007leofinajanegalleta

ANGES...

2007-11-19T22:52:00.000-08:00

Nalamiis, sumngaw a puyupoy,
Anges, sennaay pagbibiagan a daga
Agsaksagrap, mangaw-awit
Dagensen a bakbaklayen, dagiti amin a parsua.

Marikriknana ngata, tarumamis a saplit
Idungdung-aw dagiti sennaay ken pitik
Nairaked, imbalud agsasanggala a maris
Agpagus a mangputipot wayawaya ti panunot.

Nasaem dagiti urat, nagpanawan dagiti darikmat
Pinarmek balangkantis nga arapaap
Busel ken bukel natarnaw a panangilala
Kayammet dagiti gagem pinag-ut pannubok iti dana.

Ay-ayek kadi laeng, namnama koma nga itden
Inlabas man laeng ulep a nangbangen,
Intayok dagiti alipugpog, impalubos ti panunot
Kas man rurog a nailemmeng, iti panunot naitalimeng.

Bareng mapaglunnit, dagiti parbangon ken agmalem
Piglat dagiti lagip di manasas a pait
Insangbay pannakawaknit koma’t bangen pannakaawat
Kinapudno nga insangbay dagiti gagem nga agam-ampayag.

©19november2007leofinajanegalleta

L I N G A L I N G ...

2007-11-17T02:40:00.000-08:00

Agrakurak ita,
Agdadanggay a garakgak;
Agkalkallautang a rissik
Narubruban a temtem ni batibat.

Agtultuloy latta,
Kullaap a mangbangen, mangpawada
Kinelleng pannakaawat a bisbisibisan
Gundaway a sagut, tulbek koma a manglukat.

Awanan tured,
Inanay a darekdek, pinadaeg
Manga;-allilaw a kinadayag, aglemlemmeng
Linged dagiti ubbaw a saminweng ni garakgak.

Ay-ay pay, naitalimenga a namnama
Apoy manipud langit, tadem koma't kinatingra
Inkub-ay, tinippay;uray taldiap laeng koma
saann ketdi a palangguad,ti insubad ti kararua

A B R A S A . . .

2007-11-16T09:12:00.000-08:00

Naruay dagiti paliit
Iparipirip dagiti kalbit
Isangbay parasapas
Inka idadateng.

Ngem apay a mariknak
Dagiti sennaay , naitalimeng
Nailinged nalailo
Naragsak a pannakilanglangen.

Naripar ko man,
Nadagsen a linabag,
Saksakruyen dagiti takkiag
Di ka bumdeng.

Natibker ketdi
Dagiti gagem, ar-arapaapem
Masakbayan mangisakbay
Gungguna, naituyang mangpunas im-impem a saem.

©16november2007leofinajanegalleta

LINAK ...

2007-11-15T05:33:00.000-08:00

Nabannayat man ti addang,
Pakinakem a rubrubruban;
Gagem ti panagsukisok,
Diman pulos mabannogan.

Iti baet kinadawel,
Panangsuot ti panawen
Maysa a lawag ti itden
Isasangbay mo ti malem.

Di marikna’t nagbaetan,
Nalawa man a tangatang;
Naynay a mangpakpakired
Pakinakem ket agridam.

Dinto pulos a mapukaw
Tunggal darikmat, umapay
Lagip, mangsapul saranay
Balsa, innak pagpatawan.

Linak ti inka isangbay,
Idadateng; mangipaay
Mangriing man iti isem,
Napnuan regta, kinatarnaw.

©15november2007leofinajanegalleta

PANAGDALIASAT

2007-11-15T02:58:00.000-08:00

Nabannayat,
Pannakaguyod dagiti darikmat;
Naimayeng,
Isem a mangwarwar , naiputipot a kawar.

Segdan ngata,
Rimat dagiti bituen
Pabelo’t pannakaawat,
Kinki; pagannurutan ti biag?

Naruay,
Parimrim ti sellag a mangdigos
Agtawtawataw a pakinakem
Mangsarsarak ubbog pannakaawat.

Nupay agsasanggala,
Agduduma’t turungen na a dana;
Matikaw ngata panunot a mangkita,
Mangsapul sungbat, naituyang a burburtia.

Saan to a bumdeng,
Gagem a lumung-aw iti baet arimbangaw
Mangsapul kinatarnaw,
Mangpasin-aw, panunot tapno di nakullaapan.

©15november2007leofinajanegalleta

IRUKNOY KO ITA..

2007-11-15T02:56:00.000-08:00

Naulpit dagiti saplit
Naibudi kadagiti ubbaw nga arakup
Nasaem tunggal rusod
Naitalimeng kadagiti isem a mangikulbo.

Sennaay man ti isangbay
Tunggal lagip; tunggal isem
Iyaplit puyupoy nga umagek
Balangkantis a pannaranay.

Nupay natarnaw
Mairuknoy nga ayat tunggal isasangbay
Ken panangpasungad kadagiti darikmat
Panagkaykaysa, panaggargarakgak.

Wen, saplit man ti ipapaay
Tunggal anges nga iburay;
Punasen ngata, inyabrasa’t tangatang
Saem, manglimlimo a pannakidanggay.

Tunggal linabag naumbi nga arbis;
Dawat ken kararag napurisan a lagip
Inyawat babaen asuk ti saning-i,
Indatag sakaanan nadungngo a langit.

©15november2007leofinajanegalleta

BUGAS DAGITI BISIBIS...

2007-11-14T03:06:00.000-08:00

Apagbukar
Dagiti darepdep nga ikankannawag
Billit-tuleng; a mangsinga’t panagam-ampayag
Agsasamusam a parmata.

Iti tunggal bisibis,
abrasa a sagut managayat a langit;
Mangpaisem kadagiti ramut,
Pagbibiagan gandat; nasgedan nga arapaap.

Numanpay namnama, ipaspasimudaag
Rusing ken busel, tagtagibien
Manangilala a daga, adda latta rumusing
Ruot ken barsanga, pangta a didigra.

Natibker ketdi, sammaked a teddek
Madadaan a bayabay panagdaliasat iti sipnget;
Dinto bumdeng; a mangsapul, umusok, mangsukisok iti gameng
Arapaap, kaipapanan; iti masakbayan naitalimeng.

©14november2007leofinajanegalleta

ARAPAAP A SAGUT...

2007-11-06T06:07:00.000-08:00

Tunggal maimutektekan,
Naidasay a ladawan
Saibbek, ay! agkubbuar man,
Dung-aw; ayat ti kaunggan.

Agragut, rumkuas a rikna,
Mangaklili ti agdama;
Mangparmek aliaw, didigra
Mangbiag ti linak ken kappia.

Bullalayaw a naikari
Sapulen daytoy saning-i
Mangsaranay, mangted regta
Iti lubong a naiwawa.

Dinto agpulkok ken bumdeng,
Agitukit ti bukbukel,
Lansad ti tunggal kararua
Mangiyabrasa’t namnama.

Dua a takiag ken panunot,
Tunggal anges, iyarakup;
Idaton ko met a sagut
Mangsapuyot, lubong nga agtutuok.

©03november2007leofinajanegalleta

ARARAW TI AGDAMA...

2007-11-06T06:05:00.001-08:00

Nagmanto,
Ti tangatang a kalawakaw;
Mangmatmatmat,
Mangwanwanawan;
Tuok, panagsagaba
Ti agbugsuten a daga.

Dinungdungngo,
Ing-ingunguten;
Ayat ti langit
Manartaraken;
Ngem anian,
Ta damsak nagtaeng.

Agkatangkatang;
Panunot a pinarmeken ti aliaw
Napukawen simbeng,
Kararua a nabannogan;
Agpangunggan a talimpungaw,
Kaano kad nga agparbeng?

Arbis,
Bareng mangbisibis;
Sugat, saem;
Gapuanan dangkok ti panawen;
Gapu’t pannakasapsaplit,
Babaen natarumamis a sit.

©02november2007leofinajanegalleta

LAWAG...

2007-11-06T06:04:00.000-08:00

Umapay man laeng,
Saludsod iti nakem,
Mangsukisok koma,
Burayok a naitalimeng.
Padpadasek koma laeng
Batuken kapanunutan;
Kinapudno’t panangtimon
Tunggal addang mo ken gagem.

Iti baet pananglisi,
Iti silo ken palab-og;
Naimuntar iti dalan
Naruay da man a mangkigtot.
Dinto pulos a mapukaw,
Tinagibi a pammateg;
Panagayat a nabukel
Naglanglangan a panawen.

Itugot dagiti sennaay,
A daton ko ken kararag;
Naibudi a dawat ko,
Lawag koma ti maiyetnag
Mangukas pannakaawat,
Panunot ken panagkitam
Kinanumok, di mangbangen;
Ti laslasatem a dalan.

Bareng laeng mawaknitan,
Tarnaw koma’t mamatmatam;
Wayawaya ti kararua,
Naruay man a kaipapanan;
Panagpadas a mangtunton,
Panagsukisok a naruay
Maipinta a ladawan,
Nanumo a panagyaman.

©31october2007leofinajanegalleta

Umel a Dung-aw Ti Agdama...

2007-10-29T21:28:00.000-07:00

Iladladawan;
Dagiti naganus a darepdep
Dita panunot; im-impem,
Masakbayan nga inka in-inawen.
No apay,
Nga iti panawen a napukawen simbeng
Naikari a sika met ti dumteng,
Iti lubong a pinarmek pannakaidadanes.

Iti baet;
Ipangpangan mo a sasainnek
Dika man makitaan a bumdeng,
Sammaked mo’t kinatibker ken kired.
Kinadamsak ti agdama;
Kadagita matam, di pulos makita;
Iti baet panagtuok,
Pulos a dika agpulkok.

Timudem,
Agal-allangogan a dung-aw ti langit;
Mangparegta, mangpakired
Agsalsalungayngayen a karit.
Sumirsirip;
Namnama nga ipamatmat
Managarapaap nga isem
Ladawan a mangiduyok saem,
Ditoy lansad pakinakem.

Tunggal perreng kadagiti takiag a naingpis,
Asi, ayat, isu’t manglemmes;
Mabalin laeng a baklayek
Rigat nga inka sagsagabaen..
Bareng pammateg;
Umayen a mangep-ep
Panagtutuok ken rigat
Inka ita laklak-amen..

Wen, nadangkok
Panagsagaba a naruay
Maimatangan,
Iti tunggal taldiap nga ipaay.
Araraw, innak ngarud ipatayab
Bareng laeng maandingay;
Mangsaranay kenka iti sagrapem,
Naiyetnag a lunod iti masakbayan.

©30october2007leofinajanegalleta
[www/nightingalesanctuary.blogspot.com]

//lines inspired by the modern "madonna and the child"... nga agtaeng iti uneg ti kariton... iti sidewalk iti Quezon Avenue... ljgg

Arapaap Ti Agdama..

2007-10-29T03:23:00.000-07:00

Agragut,
Dagiti nagpayak a darikmat;
Wayawaya, bareng maipasngay
Rumkuas iti puseg ti kinapudno.

Narasaw,
Dagiti umsi ken garakgak;
Ibel-a’t sang-aw dagiti didiosen;
A nagkawes kinadamsak.

Naraber,
Dagiti naimuntar a tagiruot;
Pagbibiagan panunot a managimbubukod;
Mangpespes anges dagiti gundaway;
Mangiturong dana, agturong pakailansaan.

Imparabur alinggaget,
Aliaw a taraon dagiti awanan gaway nga adipen;
Babaunen a naisagmak,
Iti sidong pagarian, dagiti saraan a parsua.

Timuden pay ngata,
Nagpanes a langit dagiti araraw
Kararaua nga inay-ayat; itan, agkatangkatang
Gapuanan kinagamrud, kinaagum nga aglaplapusanan.

Bareng laeng,
Sumangbay salakan, isu’t sangkauray;
Tunggal sennaay ti pannakapaay;
Annak masakbayan nga awanan gaway.

©28october2008leofinajanegalleta

PAGTAKLINAN...

2007-10-26T12:52:00.000-07:00

[ roughly five minutes in the making...]

Salakan; inka ngata masarakan
Lansad nakatanggaya; takiag a mangallawat
Barukong nakaparsuaan, mangpaspasungad;
Ayat ti langit a maiyetnag.

Maiyetnag, mangukas nakaibaludan
Saem; in-inut a rumkuas iti kaunggan
Agragut a maipeksa, naurnong a sanaang
Namagkapsut kararua; asug, bareng maindengan.

Maindengan a kararag, ep-epen ti dakulap
Abrasa a naruay, dagusen kad nga iyawat;
Nakem a marmarned, inna pagpatawan;
Mangalaw ken mangbiag, salakan nga ayat.

Ayat, pannakaawat; dinto maipaidam
Kinapakumbaba, sapulem dita kaunggam;
Isu’t mangitunda, mangiruknoy sakaanan
Taklin, lubong a naindaklan; mangted saranay; salakan.

©26october2007leofinajanegalleta

BASIKAW...

2007-10-25T08:54:00.000-07:00

Saludsod ti naikupikop;
Tunggal anges ti panawen;
Puon ken gapu;
Gamden a saraken
Tunggal bin-i;
Naparaburan anges.

Nupay di agpulkok;
Kararua a mangsarak
Mangtakkuat,
Anag kadagiti bugas;
Burburtia,
Bareng masungbatan.
Maysa ka nga ulimek
Diak man la maripar;
Misteryo’t kaipapanam;
Di maripirip nga arapaap

Ramut ti punganay
A nakaipasngayan;
Mangipatungpal naipadto;
Inkari’t nakaparsuaan
Mangituyang;
Ganuat a nakaikarian
Nainaw ka kadi,
Iti puseg panungpalan?

Panirigan kapanunutan;
Agduduma a maris man,
Panangsirig tunggal parsua;
Agsusupadi, agsasallupang.
Ladawan a pagbasaran,
Tunggal gagem a mangtakkuat
Lawag; mamiparangarang,
Ti pudpudno a ladawam.

Adda ngata naibaet,
Namagsina a regkang
Kanito a pagrangtayan;
Punganay ken panungpalan
Kasla kadi awan sarday,
Panagtulid; kas basikaw
Ladawan pudno nga anag
Kaipapanan; imet a biag.

©25october2007leofinajanegalleta

BEKKES...

2007-10-24T08:45:00.001-07:00

Pakauna:

nasangal a sagut para iti kakaisuna a kamang ko; kararua a mangipapaay iti di maartapan nga ayat ken panangilala a mangsalsalaknib iti narasi a lubong ko... ti kakaisuna a kabsat ko.

Dennis, you are the best! Sika’t maysa a kapatgan a gameng ko. Love you always! :-)//ljgg

***************

Kadagita dakulap, iti apagdarikmat
Narabsut; paraiso ubbog ti namnama;
Lidem ti nagsaknap, in-inut nangkullaap
Taeng ti kararuam, anges mo’t nangsangal.

Nabuslon dagiti agayos a saibbek,
Lukong barukong ko, dung-aw pakinakem
Mangbalkot nga arakup, mangep-ep ti saem
Maimatangak rimat, kadagita matam impaidam panawen.

Nupay sinibbarut rungsot, kinadamsak,
Tinartaripatom, dinungdongngom a masakbayan;
Adtoy; allawatem; pammateg ko’t pagpatawam
Mangtimon ken angkla, panunot mo a nabannogan.

Numanpay ulimek, nagtagibi’t panangilala,
Punganay panawen, iti busel a lubong ta;
Iti baet dagidi naruay nga ariangga; nabiag
Kadagiti urat,; ayat, nangbekkes kadagiti anges ta.

Aypayso, nagkupas lawag ti langit ita,
Dika agpulkok,; karit ti panawen, kumpetam koma;
No agari’t aliaw, dika kad bumdeng; iwalin mo ida,
Iti agnanayon, addak likudam, saranay a mangilala.

©24october2007leofinajanegalleta
[www.nightingalesanctuary.blogspot.com]

SENNAAY...

2007-10-24T08:45:00.000-07:00

Kadagiti gundaway a lagip ket sumken
Iyesngaw sennaay saludsod ti nakem;
Isangbay to ngata’t asi ti panawen
Perreng masakbayan; naipadto a taeng.

Dangdanggayan ita
Mangliwengliweng a sipnget
Mangilinged kadi’t nasgedan a ngayed;
Partaan kad ngata, aramid a rumbeng.

Anaraar ayat; no maikanatad
Agek a mairuknoy; naynay man a mangbiag;
Imaldit nga ayat, dalluyon a naruay;
Mangparegta’t lubong a masmasnaayan.

Binalud dagiti nasarut a perreng
Insangbay dagiti balikas a nasged;
Naruay a gundaway, pinagsilpo’t panawen
Nupay agsupadi; lubong a taltaluntunen.

Anges ti barukong, nupay gangannaet,
Rikna nga insangbay pettat a panawen
Tadem kinaridam; darikmat nanglemmes
Biag pannakaawat; nawada a nakem.

Nasgedan a simbeng, timon ti panunot
Kinaawan gaway; umukuok man agturay a buteng;
Mangiparang pangta iti panagtuok;parmeken
Ikut mo nga ayat no isu’t nalupoy; anian a nagsaem.

©23october2007leofinajanegalleta

KAIPAPANAN...

2007-10-21T07:50:00.001-07:00

Sapulem;
Gandat pakinakem;
Panangtungpal takem,
Bareng langit, umisem.

Matmatam;
Lubong, pagdamilian;
Mangsukog kaipapanan,
Mangbuksil naibenggas a bugas.

Maipasngay;
Kapanunotan, mabukel;
Imaldit, lua iti pluma,
Mangwaknit; kullaap pannakaawat.

©21october2007leofinajanegalleta

PANAGTANGEP

2007-10-21T07:49:00.003-07:00

Iti panagtangep
Tawa ti kararua;
Panaglukat inaladan,
Lubong, pagbibiagan.

Iruknoy ar-araraw,
Nasged, napasingked;
Masakbayan, bukbuklen;
Intuding kadi’t panawen?

Lagip, mangbekkes
Pagmaymaysaen, bitek;
Lubong, mamagkamet;
Nakem, binalud salemsem.

©21october2007leofinajanegalleta

KARIT

2007-10-21T07:49:00.001-07:00

Nabiag dagiti bitek,
Nupay adda kinaulimek,
Sumalli-sallin; bumalla-ballaet,
Dagiti ragutok ; bibiagen dagiti aweng
Isangbay, pammateg a naitalimeng
Kadagiti rabak ken angaw
Iyarakup, dumteng a salemsem.

Timudem,
Sarangsang dagiti garakgak
Tunggal ipalliit palagip ti panagparbeng;
Agserbi a linged, tiptipden nga isem
Palung-awen ray-aw; itden ti panawen
Il-iliwen ti nakem, a mangtagtagibi
Rummusing a busel, pammateg a bin-i.

Matmatam; iyay-ayat a kari
Ipalpalamlam, manayon a masakbayan
Tagtagiurayen, mangtuktukod a panawen
Pannakaurnong kired, iti lansad pakinakem
Tapnon matungpal kari a naibenggas
Kadagiti pangta, naisawang a rabak
Mangyed ti salemsem, sumangbay a bigat.

Ibuksilam, dika bumdeng,
Ipaspasimudaag dagiti nabara a perreng;
Mangtuktukod tibker, kinapudno
Italtalukatik dagiti balikas a ssan a maiyebkas,
Nupay iyarakup dagiti gundaway
Mangrangtangtay pannakaila a nangkayaw,
Nangpasantak ramut iti di mailinged ;
Aglaplapusanan nga ayat.

©21october2007leofinajanegalleta

LADAWAN...

2007-10-21T07:47:00.002-07:00

Tunggal maibun-ay dagiti sennaay,
Araraw ken asug iti nakem a naruay;
Mangisangbay koma’t natarnaw a lawag
Parabur ti langit; gameng pannakaawat.

Panagraem; bareng di makullaapan;
Garumiad ken piglat, maimutektekan;
Nangmuli iti biag, pagrukbabam a ladawan
Saan ket a darepdep, agparang tunggal sardam.

Kadagiti kanito nga inka panangmatmat,
Nanumo a dawat, inka tandaanan;
Matmatam ti gap; mangbiag kadagiti ganuat;
Kinapudno’t kawes; di koma agsurok wenno kurang man.

©21october2007leofinajanegalleta

PERRENG...

2007-10-21T07:47:00.001-07:00

Dika kad bumdeng, inka matmatan,
Takuatem ti imet; lubong, pagdamilian
Mangsukog naitalimeng a kaipapanan
Bugas; dagiti paltiing a naibenggas.

Babaen kadagiti pumpumsuak a lua,
Panunot a buklen; imaldit ti pluma;
Tulbek a manglukat ti pannakaawat
Lawag a mangwaknit, kullaap panagbiag.

Sapulem kadi iti tunggal perreng,
Natarnaw a gandat, lansad pakinakem;
Inallawat a takem, tungpalen; kas adipen,
Babaunen; natan-ok a langit, bareng mapaisem.

©21october2007leofinajanegalleta

PAMMASINGKED

2007-10-21T07:45:00.000-07:00

Tunggal sumangbay, oras panagtangep
Tawa ti karurua; tanda’t panaglukat
Inaladan; taeng naruay a darepdep
Lubong; pagbibiagan, rusing ni pammateg.

Tunggal isasangbay a tagtagiurayen
Saan a mapengdan, saludsod a sumken;
Nabiag a ladawan, in-inut a buklen,
Naituding kadi, inkari’t panawen?

Iti iruruknoy, araraw a nasged
Iparang ti langit; sungbat, mangpasingked
Umiso kadi, taltaluntunen a desdes?
Agdanggay a lasaten; itunda’t pammateg.

Lagip a naitukit, bareng umanayen
Nagkadua a lubong, isu ti mangbekkes;
Mamaysa a bitek, isu’t mamagkamet
Mamaglantip nakem; binalud salemsem.

©21octobe2007leofinajanegalleta

Aplaw Ti Salemsem

2007-10-19T09:57:00.000-07:00

Namaris dagiti kaipapanan,
Maripripar a pangngarig; naibengngas,
Naikur-it; ladawan masakbayan
Inkari; dagiti lumtuad a pagilasinan.

Timudek man, dagiti natinggaw nga aweng,
Parnuayen dagiti maputar a ritmo,
Ipasngay ti agdanggay a ganaygay ken kired
Bayat panaguray idadateng; umiso a panawen.

Maimatangak itan,ilulung-aw dagiti uggot;
Ket tumammidaw narimat,namnama nga isangbay;
Ipasabat dagiti rusing,naisem a bin-i;
Tinagibi't ayat, inallawat a kari.

Bay-am ngarud nga iturong ket ilili,
Babaen ti anges; pul-oy a naumbi;
Ti agam-ampayag; ullaw, inka impatayab
Tanda a mangiladawan ti dana a nakaikarian.

Adtoyak, adipen ti isem a mangmatmatmat;
Inka panangtakuat kadagiti palimed a naimaldit
Pinanid a mangikut, tuntuntunem a kinapudno
Tulbek a manglukat; ridaw ti naituyang a panungpalan.

©190ct0ber2007leofinajanegalleta

PALTIING

2007-10-18T05:51:00.000-07:00

Binalkot ti langit, naipasngay a bukel
Nakupikopan, namnama ken kired
Kalasag, salaknib, parabur a nasged
Simbeng ti panunot, isu’t sarikedked.

Isangbay aranaar; parbangon maipasngay,
Akem a naituding; mangwaswas ti kawar;
Nangbekkes, nangbalud iti kaipapanan
Naruay a pangngarig, agtaeng ti kaungan.

Iti tunggal anges, agragut a rumkuas
Ayat a mangsibog busel nga arapaap
Rubruban dagiti mabukel a ganuat;
Addang a mangsarak; dana’t panungpalan.

Impadto’t panawen; sumangbay a dawel
Buteng ken dagensen; babak a manglapped
Pannakaipatungpal napateg a sagut
Natarnaw nga ayat; kari’t agnanayon.

Intukit ti punganay marikna a gagem
Ruk-atan dagiti lumabas a pagteng
Babaen ti gameng lansad pakinakem, .
matungpal dagiti naituyang a takem.

Nabatad dagiti uges a maikur-it
Mangsangal ti lagip; naituding a langit
Ladawan dagiti tugot a maimaldit
Desdes ti panawen,agnanayon a maikitikit.

©18october2007leofinajanegalleta

SARMING

2007-10-14T06:15:00.000-07:00

Iti kanito a matmatan,
Mangrukrukod nga ikikitam,
Iyabrasa’t mangtingtingiting a mata,
Mangtuktukod; rimat dagiti gandat.

Sapsapulem sin-aw kinapudno;
Abalbalayen dagiti tarigagay
Naynay a mangtukay panunot;
Tarnaw ti nakem, isu’t mangrukod.

Ipakitam dagiti anniniwan;
Wangis a di maimutektekan,
Iyetnag mot’ lawag a mangasapul;
Naitalimeng a kaipapanan.

Gutgutuguten dagiti parimrim
Maris a nailinged,
nakullaapan a panagkita
Mangbuksil; manglimlimo a simbeng.

Iparangarang mo dagiti karit
Mangted lubong a namaris,
Dagiti taldiap mo’t mangtimon
Wagas; dana a maiparbeng.

Waknitam ti imatang,
Babaen perreng a makapurar
Mangrebba’t pader ti kinalupoy;
Mangdadael sin-aw pakinakem.

Wen, dinto pulos maparukma;
Tarnaw kinapudno tunggal ikikita
Mangitundat dana, puling mapukaw da,
Mangpasin-aw iti panagkita.

©14october2007leofinajanegalleta

AWENG

2007-10-14T06:14:00.001-07:00

Agsupadi’t lawag
Tangatang a mangbiag;
Kadagiti dayyeng
Aweng ti panawen.

Sangalen dagiti bitek
Nasgedan nga samiweng
Nabiag a balbalikas,
Ikur-it sumangbay a salemsem.

Agdanggay a pitik,
Annayas a naruay,
Dagiti maputar
Ritmo ken kumpas.

Iyesngaw ti nakem,
Aweng a nabatad
Koro, imalimaldit;
Mamaysa a langit.

Mangtagibi’t bukel;
Tarigagay a nasged.
Maallingag ngata’t dayyeng;
Ipatpatayab umel a pammateg.

Nasgedan a kumpas
Lung-ay napuan ayat;
Bayat panangdanggay; ragutok
Mangbiag, kadagiti samiweng a daton ti sardam.

©14october2007lleofinajanegalleta

DAREPDEP

2007-10-14T06:09:00.000-07:00

Makapnek ti ulimek,
mangsulnit kadagiti baet
Rangtay; mamagkamet
di maibuksilan, datdatlag a bitek

Ragutok; iti barukong agtaeng
Dinto pulos bumdeng a mangsapul
Desdes a mangtagikua,
kigaw a panawen.

Panawen; rangtay a mangitunda
Abrasa ken isem
Mangparaniag rimat,
Mapatgan a dawat.

Laplapdan nga isem,
Umanayen a mangpasantak;
Pammateg a biagen dagiti darepdep
Iparabur ngatan saksi a bitbituen.

Nabiag a ragutok nu lagip ti dumteng
Mangsukisok, kaipapanan a di maibuksilan,
Panunot ken simbeng, isuda’t nangitalimeng
Nalimed a rimat, nangbalud ti nakem.

©14october2007leofinajanegalleta

TALDIAP

2007-10-14T05:56:00.000-07:00

Isagut dagiti uged
Namaris ladawan a lumtuad
Parnuayen dagiti parmata;
Agkatangkatang a rikna.

Agampayag iti tangatang,
Kambas a nakaimalditan
Buya’t namaris a lagip;
Kalman, mangiparipirip.

Iyaplaw anges ti amian;
Bitek ti kebba ken segga,
Iyagos ngata’t bayakabak,
Panagduadua a marikna.

Padpasaden a rangtayan
Maiparang a ladawan
Mamangkamet kadagiti desdes;
Naglabas ken masakbayan.

Sapuyuten ti salemsem
Sagut agtabon a malem
Mangukas danag iti nakem;
Manen, rumusing ni isem.

Impataldiap kadi dagiti ulep
Kari a sagut dumteng a panawen
Intuding ti masakbayan
Naitukiten ti nakem.

Adda latta aligaga,
Nupay umapay ni regta
Tunggal darikmat a dumteng
Mangtukay dayyeng ti rikna.

©14october2007leofinajanegalleta

SAGUT

2007-10-12T23:41:00.000-07:00

Tunggal addang ti panawen
Isasangbay dagiti sagut;
nakupikopan pammateg
Binalkot kadi ita,
garakgak wenno saem?
Namnama; iyabrasa
bullalayaw iti daya.

Mayetnag kadagiti dakulap;
allawaten ti nakem; mangtakuat
Kaipapanan a sukisuken
kdagiti pinanid nga ukagen
Nakaimalditan dagiti pagteng.
Ibuksilan, pasantaken
Panunot; parabur mo met laeng.

Gameng a naitalimeng,
padasen a biruken
Arasaas ti panunot;iyebkas
Tunggal anges nga ipusuak
barukong; taeng dagiti bitek
Lubong a pagbibiagan;
Agsasallupang a kaipapanan.

Tunggal bukel nga intukit,
Naibuksilan a bin-i
Bisibisan panagayat
biagen ti pannakaawat,
Iyabrasa; iparangkap,
Mangted talged, linak ti biag.

©12october2007leofinajanegalleta

DARIKMAT

2007-10-12T02:12:00.000-07:00

Naatap dagiti darikmat,
Namagsilpo ; main-inaw a ritmo,
Parnuayen agdanggay a ragutok
Agsumbangir a pungto ti lubong.

Naatap dagiti darikmat,
Namagsilpo main-inaw a ritmo,
Parnuayen agdanggay a ragutok
Agsumbangir a pungto ti lubong.

Idayyeng rumkuas a tarigagay
Iliw panawen a pannakamatmat;
Rimat kadagiti mata mangsegged
Gil-ayab nasged a pammateg

Ayug dagiti balikas mangriing
Nakaibenggasan rumkuas a tarigagay;
Itunda dagiti darepdep dita sibay
Rumangpaya sam-it panangilala.

Kaibatugan a langit mangiparipirip
dungngo a naibenggas kadagiti paludip
busel nga intugit agsapa a dimteng
natarnaw nga ayat sumingsingisingen.

Parabur mangisangbay sin-aw
Sirmata ti naituding a panungpalan?
Darikmat rangtay a mangitunda
Tinagibi imnas ti iliw ken segga.

Timudem sennaay a mangibalikas;
Bitek ti barukong mangtungpal
Pannakaidatag nakaikarian,
Manayon kadin, agnayon iti sibay?

©11october2007leofinajanegalleta

ISASANGBAY

2007-10-09T18:56:00.000-07:00

Iti isasangbay,
Panaglantip nga inyebkas ti punganay;
Adtoyak; pasungadak ti idadateng,
Naipadto a gundaway.

Iti panangallawat,
Takem a nakaikarian
Mangipasimudaag,
Panagtulid; pilid ti panawen.

Agay-ayam,dagiti saludsod;
isem kadi a naitalimeng?
Wenno gubat a sarangten,
Isangbay; ti inka idadateng.

Ipaay mo ngarud,
Pammatalged nga agek; mangbiag
Nasebsebanen a temtem;
Ket mapagungar; kired a nasged.

©10october2007leofinajanegalleta

PANAGTULID

2007-10-09T18:35:00.000-07:00

Agkurno a sidadayaw,
Nagpanawan ni tagainep
Nakaparsuaan a nagkawes
Linnaaw a sagut ti nagpatnag.

Nagpatnag,
Isu’t maikupin kanito a panangriing;
Dagiti naumbi nga agek;
Iti lubong mangted ngayed.

Ngayed,
isu’t nangilili; nasimbeng a ridep
Napnuan darepdep a nalukag
Iti arakup naisem a salemsem.

Salemsem ken regta
Isangbay na ida,
Mangipaay talged,
apagbukar nga agsapa.

Agsapa,isu’t sarikedked;
Dawel,parmeken na;
Pangta ni dagensen
Ikuyog ti lumabas ti agmalem.

Malem a mangeddeng,
Umiso ket maiparbeng,
Iruknoy a daton,
Dunga-aw wenno isem?

Isem a mangtukay,
Paludip ken taldiap
Agtabon nga init,
Pumakada itan.

©09october2007leofinajanegalleta

PALUDIP

2007-10-06T21:55:00.000-07:00

Apagdillaw dagiti isem a maipasngay,
Tunggal tumammidaw,
Layap a mangisangbay iti naipatayab
Agek kadi a napnuan pammateg?

Dagiti kablaaw nga ikalbit,
Mangbisibis kadagiti paludip;
Salemsem a parnuayen ragutok ken pitik
Dagiti di maiturong, darepdep a nasam-it.

Tunggal umagibas, aplaw; talingengen
Regta a mangparnuay, a mangbiag ti essem
Dagiti namaris, balikas a mabukel
Mangaywan, mangbekkes; rumusing iti nakem.

Nupay di mapengdan lumtaw a panangilala
Bitek nga agtaeng, idaydayyeng rimat kadagiti mata
Bendisyon ti langit, parabur a regta
Mangbiag ti pammateg, nupay adda kebba.

Wenno maysa kadi, pannubok nga itden
Tapno ibuksilan, lumabas a panawen
Pannubok, mangtenneb; kired pakinakem
Salaknib manipud sumangbay a dawel.
Maysa a burburtia, nangayed a rikna
Nupay mangted aweng, adda aligaga
Sungbat ti pangngarig, mangitunda’t dana
Desdes nga agturong, pannaikanawa.

©07october2007leofinajanegalleta

PANAWEN

2007-10-06T15:33:00.002-07:00

Nalag-an, dagiti apagapaman nga addang,
Nangted lawag iti pannakaawat,
Kas man nailinged nga isem ti kabus
Gappuanan dagiti ulep a mangyetnag iti bayakabak.

Nupay impalubos dagiti darikmat
Pannakaitanem ti bukod a waya-waya;
Ket nalapdan kadagiti addang,
A nangkeltay dagiti naikari a sagut.

Wen, nailemmeng ket nagtaeng
Kadagiti lukong ti dakulap,
Tulbek a manglukat iti tuleng a pannakaawat
Ket nagtulid ti panawen iti maris ti rabii a kidem.

Nupay di nagparbeng,
Rikna a mariing babaen ti samiweng
Inkur-it ken inyayug iti billit-tuleng
Nangilukip laeng iti ruangan ni darepdep.

Isangbay ti angep, mamedped pannakawaw
Mamagtangep dagiti rengngat a parnuay
Pannubok nga insangbaydagiti naglumen a kalman,
Nangpunas, nangitanem, naynay a regta ken panagtalek.

Urayen ket pasungadan a dumteng,
Bileg a mangruk-at nakapupok a nakem
Nupay nairanta a salaknib kadagiti pangta,
Mangipaidam pannakatungpal naiyebkas a sapata.

Itan a nalawag dagiti tagainep nga itden
Umadani a nakatungpal, intudingen ti panawen
Agari ti ayat, agampayag, iti tangatang ni waya-waya
Agrusing itan dagiti nalapdan panagbukar na a parmata.

©07october2007leofinajanegalleta

RAMUT: Maysa a Naimaldit a Lagip

2007-10-06T15:33:00.001-07:00

Nasakdok dagitoy a pasamak iti panangsarsarungkar ko ken Inang Rosing, ti nangpadakkel kaniak. Dagitoy a lagip ket inurnong ko base iti panagpatpatang mi. Natukay man ti riknak a nangimaldit gapu ta dakkel ti pakainaigan na iti nagtaudak a pamilya. Daytoy ti maipapan kadagiti apong ko iti tumeng ken kasta metten iti kasasaad dagiti apong ko a lallakay ken babbaket. Iraman ko pay dagiti pasamak nu kasano a nakadanon iti probinsya ti Cagayan ti pamilya mi nupay adda iti Sta. Lucia, Ilocos Sur ti puon mi.

Nupay saan kon a nadanunan a sibibiag, saan ketdi a binaybay-an dagiti apong ko a dumakkel kami nga saan mi nga ammo dagiti apong mi iti tumeng. Ita man laengen nga adda panawen ko a mangsubli kadagidi naikupinen a pinanid nupay saan kon a nadanunan iti pannakapasamak da. Iyan-anay ko ngaruden dagiti lagip nga impaima ti maysa kadagiti takiag a nangtarabay ken nangtagibi kaniak. Ni Inang Rosing.

Iti ammok idi, dua laeng ti kabsat daydi Tatang Itok. Ngem segun iti estorya ita ni Inang Rosing, adda kano uppat a kakabsat da a natay gapu iti sakit. Daydi Tatang Itok (Salvador) ti apong ko a lakay, ken isu ti kadakkelan nga impluwensya iti biag ko. Daydi apong ko nga Ilis ti inaunaan da. Dakkel a lakay nga puraw ti barbas na, ken kanayon ko a kaapa idi ubingak ta imudumod ti barbas na iti pingping ko, yagawak to ti tumaray a rumuar sako guyaban nu tuman-aw iti tawa. Saanen a makapagna idi ta na-stroke ngem nalasatan na pay. Malagip ko a kanayon ko a kadkaduaen idi agingga a mapagura nak, hehehe. Ngem agsubliak to met latta ta pagaayat ko dagiti isursuro na a kankanta. Kasta met a kaay-ayam ko iti sungka nga isu ti pagpalpalabasan na iti oras na iti agmalem. Buridek ni Inang Rosing, saanen a nangasawa pay. Ni Inang Rosing ti nagpadakkel kenni Tita Meann, simmaruno kami ken ading ko, ken ita, da Ryann ken Aira, dagiti dua a nga annak ni anti Meh. Kas met la kadakami ken Dennis (ading ko), naiyanak amin dagiti apong ko iti Paoc Norte, Sta, Lucia, Ilocos Sur.

Tawen 1937, sakbay iti isasangpet dagiti Hapon. Daytoy a tawen ti panagdappat ti pamilya daydi Apong ko iti tumeng, ammok laeng iti nagan na nga Apong Ago (Feliciano) iti probinsya iti dayta a paset ti Cagayan. Ubing pay ni Inang Rosing idi sumangpet da a sangapamilya iti daytoy a lugar. Panaguma wenno panagtrabaho iti Hacienda ti nakaallukoy kano ken daydi Apong Ago tapno sumina iti nagtaudan na a lugar sadiay Ilocos.

Segun ti estorya ni Inang Rosing, maysa a Hacienda ti nagsangpetan da kadagidi a panawen. Daytoy a hacienda (kukua ti pamilya a taga Ilocos Sur) ket nagbalin itan a barrio iti Villa. Saan kano pay idi a naikaraman a teritoryo ti sitio Namunit a parte ti Buguey, gapu ta iti laeng ballasiw ti karayan ti nagpatinggaan ti beddeng daytoy (boundary ti Centro East ken Centro West iti agdama, iti ili a Sta. Teresita). Ti sitio Namunit ti nagbalin nga ili ti Sta. Teresita, ti kaubingan nga ili iti probinsya ti Cagayan. Sakupen kano pay laeng idi ti Villa dagiti agdama itan a barrio ti Villa ken Centro East, agraman iti nagtakderan itan ti dapon ken munisipyo.

Iti lagip ni Inang Rosing, sangapulo a balay kano laeng ti nasangpetan da a nakatakder iti Villa. Dagiti pamilya Guerrero, Gabatin, ken Sabalo iti laud a parte, dagiti ag-Marquez, Ildefonso, ken dagiti Tibuc (puon a nagtaudan ti apong ko a baket), ken isuda a Galleta (angingga ita a panawen ken awan pay ti nainayon a kaburburik mi). Nalawa kano a kataltalonan daytoy a disso. Awan kano pay a pulos ti nakatakder a balay kadagiti parte a kumamang itan iti barrio ti Mission kasta metten iti nagtakderan itan iti elementarya ken ti pribado a sekondarya nga isu’t nagadalak. Ad-adu kano nga amang dagiti pamilya nga adda iti dadduma a purok a kas iti Gulasing ken Dungeg ngem dagiti agindeg iti Villa. Immadu laengen ti bilang da idi nalpas ti gubat, ket immakaren dagiti adda iti purok ti Gulasing ken Dungeg gapu iti risgo nga inted ti kaada dagiti HUK.

1946 ti matandaanan ni Inang Rosing nga umuna nga idadateng dagiti Hapones iti Villa. Daydi Apong Ago ti agdama a tenyente del barrio. Baro kano met idin dagidi apong ko a lakay. Nadamdamag dan iti panagsaknap dagiti pwersa ti Hapones isu a nairugi metten daydi Apong Ago nga indauluan ti pannakabuangay ti grupo dagiti lalaki a salaknib ti lugar, dagiti bolomen.

Idi kano damo dagiti Hapon ti agsangpet, saan da a sigud a narungsot. Napintas kano met iti pannakigamulo da kadagiti lumugar. Adda barter system iti bigat; dagiti itlog ken bagas dagiti lumugar ket sukatan met dagiti Hapones iti sabon, gaas, ken dadduma pay nga awit da a produkto. Nupay kasta, nalimed kano met latta iti panagsansanay dagiti bolomen a naikkappeng met idin ni Tatang Itok.

Iti panaglabas ti panawen a pannakipulpulapol da kadagiti Hapones, nadlaw dan ti in-inut nga panagrungsot dagitoy. Nalabit ket awanen ti dumteng nga abasto da ta mamalay-balay da kano idi nga agdawat iti makan, dinguen, ken dagiti mula a masida ken prutas dagiti tattao. Makitan ti uyong da nu saan nga maited$ dagiti agindeg dagiti dawaten da a masapsapul da.

Ketdi, adda naitulong ti sakit a malaria kadakuada. Kabuteng kano dagiti Hapones nga asitgan dagiti tao nga agsakit iti malarya. Nagbalin ngarud a kalasag daytoy dagiti tattao aglalo dagiti babbalasang tapno saan da a madangran wenno maidadanes. Agpammarang da nga adda malaria na no adda sumangpet a Hapones. No kano addan pakdaar nga adda dumteng a hapones, iyagawa da kanon a bedbedan dagiti ulo da, kasta metten nga agkebbet da iti ules a ken agpammarang nga agpaypayegpeg. Saan kano pulos a sagiden ida dagiti Hapon.

Nagbalin a kamang dagiti lumugar dagiti uma a dalus da iti banbantay. Saan kano a pasyaren dagidi Hapones dagitoy a disso. Adda kalkalapaw da iti sirok dagiti napuskol a kakaykaywan ket ditoy da a nagnaed iti kangitingit ti gubat. Nupay awan kano met ti nadangdangran malaksid kadagiti kabangibang nga purok, napilitan met a nagbakwit dagiti lumugar iti Villa a napan naglemlemmeng iti banbantay ti Sierra Madre agingga a nasunson dagiti Hapones ket nalpas iti gubat iti idadateng dagiti amerikano. Iti panagsubli sa iti balbalay a pinanawan da, daytoy metten ti panawen a nanayunan ti bilang dagiti lumugar idi addan sabsabali pay a nagbangon iti balbalay da iti Villa.

Ditoy a lugar ti nagsarakan dagiti dalan ti apong ko a baket ken lakay. Maysa kadagiti bunga da ti amak. Nupay sadiay Ilocos ti nakayanakak, ad-adu a paset ti kinaubing ko ti pinalabas ko iti daytoy naulimek ken natalna a purok. No adda man naisalsalumina a saguday ti lugar a dimmakkelak, daytoy ket ti kinaasideg ti langit. Narimat nga agpayso dagiti maibun-ay a bitbituen kadagiti nangayed a sardam iti Villa. Kas man la na napagasatan daytoy a lugar nga arig na masukdal ti imarang dagiti nangayed a naimurumor a rimat iti awan pulos mulit na a sardam, kasta metten ti raniag dagiti sagpaminsan a lumabas a layap.

Nalabit, ditoy a nagkubuar ket nagbiag ti ubbog ti pluma a tartaripatuek gapu iti nakaparsuan a nangtagibi kaniak. Dagiti narikna ken namatmatak a kinangayed a naibenggas iti ubing a karuruak ti nangted aweng kadagiti linabag nga ipuspusuak ti panunot ken riknak, no matukay iti sagpaminsan. Wen, daytoy a lugar ti nangtaripato ken nangmuli kadagiti ub-ubonek a balikas a nasagpawan kadagiti aweng a parnuayen ti managarapaap a nakem nga insagut ti namarsua kaniak.

©06october2007leofinajanegalleta

ISEM

2007-10-04T15:54:00.000-07:00

Talinaay ti ipaay,
Isangbay dagiti linnaw
Nabalkot dagiti darikmat
Kadagiti naitalimeng nga isem.

Iyarakup dagiti taldiap
Nupay naarpawan kadagiti ulep;
Sagut a mangbibiag
Kadagiti sumangbay a parbangon.

Sublian to pay ngata,
Nga ukagen ti panawen
Pangted nga inulila,
Panagtabon a naikupinen.

Nupay inlili ni ridep
Panagpitik pulso ken anges
Biagen ni isem ken tagainep
Namnama a di maparmek.

Wen, dinto koma manglaylay
Dagiti lumtuad nga isem
Ubbog a mangdaripespes
Rengngat kadagiti urat.

Nupay saan pay a limtuad
Lawag a mangipasimudaag,
Dinto gamdeng ti nakem;
Isem ti di agkupas a namnama ket aglumen.

©05october2007leofinajanegalleta

TALDIAP: Dagiti Lagip nga Imbati Dagiti Nagtulid A Panawen

2007-10-02T07:18:00.000-07:00

Padpadasek man nga urnongen dagiti lagip nga imbati dagiti nagtuliden a panawen.Dagitoy ti mangiladawan panawen ti kinaubing ko. Mamatiak a ti kinataok ket nasukog babaen kadagitoy a “babassit” nga estorya ken paspasamak. Mabalin tayo a kunaen nga dagitoy a sirkumstansya ket awan iti espesyal a kaipapanan na, ngem mamatiak nga amin a kanito ket naindaklan a sagut. Ngarud, amin a pasamak ket addaan amin pateg; ramen amin dagitoy a mangitunda kadatayo iti masakbayan ken mangsukog iti ladawan iti kabukbukodan tayo a kinatao...

Sublianak ngrarud ti sarusar a nakaidulinan dagiti naglablabas a pagteng, tapno innak ikur-it dagiti balikas ken sirkumstansya a nagbalin a paset dagiti lagip a di nagmawmaw iti rimat na. Saan da pulos a naglumen bayat iti panagtulid ti panawen. Nalabit, sukugen dagitoy a lagip ti bukod yo a panirigan ken panangiladawan babaen iti bukod yo a pannakaawat ti kinasiasinok. Dagitoy a paset iti panawen ket naimaldit, a saan nga napagsasaganad;

Umuna a Paset: “SIESTA”
****
Naladaw bassiten iti sardam. Addak ton iti indayon a mangbungol bungol iti mamador ko iti uneg ti indayon a rattan. Matmaturog to metten ti adiek. Addan to pay laeng ni Anti Sylvia (kasinsin da Papang nga taraken sa inang baket ta awan ti anak da a babai) nga mangdumdumog iti libro nga ususaren da iti St. Francis Academy. Addan to ni tatang nga agdubdubla wenno agpaypayubyob iti abay ti ruangan a kumamang iti bangsal. Addanto pay laeng ti apong ko a baket nga agkudit kudit iti kusina a naiyariping met laeng iti bangsal.

“Naibus mo ta dede mon, apok? Maturog kan ken adda’d tan ni Islaw a dakkel ti buneng na”, pamutbuteng ni Tatang Lakay.

Tumakderak met a mangwanawan iti ridaw.

“Ayan nad’ta Islaw Tatang? ‘taek man?” Saak to agpilit a bumaba iti indayon a mangwanawan iti “islaw” iti ruangan.” Saan ko met kita?”

“Adda dita kasipngetan nga aglemlemmeng, agitalaw ti ubbing nga saan a nasapa nga maturog!” ti sungbat ni Tatang Lakay.

Wanawanak to ti nasipnget a paraangan mi, “Apong Islaw, adda ka dita? Dakkel buneng mo? Kitak man!” Syempre, allingagek to nu adda sumungbat; “Apong Islaw! Apong Islaw! Apay tuleng ka?” Syempre, awan sumungbat.

Mapanak ton agpasaklot iti apong ko a lakay. “Tatang, awan met Islaw? Bagam adda... Hala, kidnap ti kibbaan ngatan... Inang, pukkaw mo Apong Islaw, kakaasi, awan ules ken pungan na... piman, turog diay balay kibbaan..”

Madlaw kon to iti panagkikinnita dagiti nataengan. Umanges to laengen iti nauneg ni Tatang Itok nga agngilngilangil. Malagip ko ti ilinglinged na nga isem bayat iti panangisiki na nga agdubla iti tabako na iti asideg ti sinulbong a pagsilawan mi. Ngamin ket, adda ak to met a nakapasaklot nga agnutnutnot iti kanawan a tangan ko nga mangpanpanunot ti kasasaad ni “islaw”, [nyehehe! Oist, uppat laeng ti tawen ko iti daytoy nga paset ha? :-) ]

Dandani idi rinabii ti kastoy nga eksena, agarup uppat ti tawen ko idi. Awan a pulos kabuteng ko a pamutbuteng da kaniak tapno maturogak a masapa, nyahaha.. :-)

****
Pagbaetan dak da Tatang Lakay ken Inang Baket a maturog. Kadawyanan a makaturogak nga agsasaibbek ta kakaasi ni “prinsesa Maria” nga imbalud ti bruka; kakaasi pay ni “prinsipe Don Juan” a napan nangisalakan kenni prinsesa ta nabisbisinan ken napirpirsay payen ti bado na iti rigrigat na piman..

Dagitoy nga estorya ti pangpaturog ni Tatang Lakay kaniak idi ngem kanayunak nga agsangit nu madanun diay parte nga kakaasi ken marigrigatan dagiti bida, hehehe!

Adda idi parnuayek a bumangon iti apagligsay a tengnga ti rabii. Riingek to da tatang lakay ken inang baket. Ibagak a makaisbo ak. Diak kayat ti maysa laeng a kadua, masapul a rummuar da a dua iti muskitero uray adda laeng diay suli ti arinola.

Ngamin ket iruar kon to tay “tren” (basyo ti posporo a pagsisilpuen ni Tatang lakay..) tapno agay-ayam kami a tallo.. agdubla dan ton ti tabako da bayat ti panagpataray ko iti “tren” ko iti aglawlaw ti kingki a pagsilawan. Awan pay ti elektrisidad iti lugar mi idi. Nagbalin daytoy a paset ti ritwal mi a dandani rinabii agingga iti simrekak iti grade one, :-)

***

Pangaldaw. Nalpas kamin a nangan. Ikanayon ton ni Tatang Itok iti aguldag iti bangko iti sala.

“Fina, umay kan ta rumidep ta apok, sakanto agay-ayam. Alaem ta pungan mon ta agabay ta a maturog.. Adda estoryak. Diak ibagbaga nu saan ka a maturog,..”

Gapu ta adik nak iti estorya nga ubing, dagusek ton a gaw-aten tay bassit a pungan ko nga inaramid ni Inang Baket, agraman tay ules...Uray tengnga ti aldaw ket agules nak a maturog. Addan to tay kopya ti bannawag nga iggem ni Tatang. Iti babaen ti bangko nga ayan na iti pagiddaak tapno makitak ti ladawan ti komiks a paset ti bannawag nga basbasaaen na..

Bayat ti panagbasa na, singaek a kanayon gapu kadagiti saludsod a malagip ko a damagen maipapan iti basbasaen na. Naanus ketdi ti apong ko a mangipalawag kaniak iti wagas dagiti nataengan. Nu dadduma, idalan nak a mangamiris kadagiti saan ko a maawatan babaen kadagiti saludsod na. Iti aglima a tawen ko, naisuro na kaniak iti panangusar iti panunot a mangamiris kadagiti banbanag nga saan a nalawag, sakbay a damagen kadagiti nataengan.

Ketdi, kanayon met nga umun-una ti apong ko a makaturog. Pagam-ammuan, agsardeng ton nga agbasa ta agurok to metten. Pidutek to met tay natnag a Bannawag tapno buyaek dagiti ladawan ken nu ania payen dita.

Naminsan a simrek ni Inang Rosing (kabsat ni Tatang Itok a baak, isu’t nangtartaraken kaniami ken ading iti kaadda ni Mamang iti ballasiw taaw..), nadanunan nak nga mangmitmitir iti Bannawag ta naturugan nak manen ni Tatang.. Ti kano impagarup na ket ammo kon ti agbasa ta agsasao ak bayat iti panangmulengleng ko iti magasin.

“Apay ammo na ngatan aya ti agbasa daytoy ubing ket saan pay met a nasursuruan?” kunkuna na iti bagi na. Ngem idi makita na a balinsuek ti panangiggem ko iti magasin, permi a paggaak na.

Tultuladek ngamin ti panagbasa ni Tatang lakay base iti pannakatandaan ko bayat iti panangdengdengeg ko kenkuana. Aglima ti tawen ko idi. Natadem ngata iti lagip ko ta umiso kanu met dagiti balbaliksek a sarita iti naisurat. [natadem ngata iti lapayag ko idi ta urayak la agsangsangit iti kakukurikor ni Inang nu malpas nak nga agdigos, hehehe..]

(Ituloy kon to manen inton maminsan ket masadutak metten nga agtype, hehehe. Agtomar nak man pay saak to maturog..) :-}

©2007leofinajanegalleta

PASKUA MANEN...

2007-10-02T06:57:00.000-07:00

PASKUA MANEN

Agtengngan ti rabii. Natalnan ti aglawlaw iti kastoy nga oras. Ah, adda met panawen iti ulimek uray iti na-arriangga a siudad. Inlukat ko ti tawa iti second floor a flat ko ket dagus nga immarakup ti nasalemsem nga angin. Inkidem ko iti immanges ti nauneg ket inpalawlaw ko ti panagkitak kadagiti bimmalitok nga atep dagiti balbalay ken pasdek. Makaited man ti pannakapnek ken talinaay iti kaungan ti kinangayed ti lubong nu kastoy a sellag. Kas man panangmatmatmat iti maysa nga obra maestra; maysa a naipinta a ladawan.

Naiturong ti imatang ko iti law-ang, ket nakaiinnisemak kadagiti kumidma-kidmat a kiray dagiti riniwniw a bitbituen. Nadalus ti tangatang a kas man nagpanawan dagiti ulep. Timpuar ti isem ko ket nabayag a pinerreng ko ti langit. Kas man adda batombalani ti kiray dagiti bitbituen ta kasla aglalo a tumarnaw ti rimat da gapu iti lawag nga iparparaman ti naslag a bulan. Ah, awan maka-artap ti ngayed ti nakaparsuan a nangdaripespes iti kaungak.

Ginaw-at ko ti gitarak, ket insanggir ko iti pasamano a nangipwestuak kadagiti throw pillows a mangsuporta iti likod ko. Apagapaman a kinalbit ko dagiti kwerdas a pangur-urayak iti inspirasyon a mamagkuti kadagiti ramramay ko a mangputar manen iti kanta. Nabayagen daydi naudi nga komposisyon ko. Pinasadaak iti mano a daras dagiti kwerdas. Inkidem ko nga inay-ayam dagiti malagip ko a pandag ngem kawaw ti maparnuay ko nga aweng. Nalabit, gapu daytoy kadagiti agsasallupang a banbanag nga agam-ampayag iti panunot ko.

Gapu ta awan mapanunot ko a pyesa, indissok ti gitara ket ginaw-at ko ti lapis ken legal pad iti side table. Diak man ammo ngem kaykayat ko nga amang ti agimaldit babaen iti manual a panagsurat ngem iti mangideretson iti laptop ko.

Nariknak iti apagapaman a salemsem nga insangbay ti sang-aw ti amian. Oktubre man gayamen, mangrugin ti salemsem a mangipasimudaag ti idadateng ti paskua. Mano laengen nga isisingising ken ilelennek ti init iti mpalabas ket sumangbay manen ti padpadaanan ti sangalubungan a selebrasyon. Paskua manen. Nagay-ayam iti panunot ko dagiti napalabas a paskua. No pagdadasigek dagiti nakalalagip a paspasamak iti tunggal simmangbay ken naglabas a paskua manipud kinaubing ko, agduduma dagiti rason a nangpamaris kadagitoy.

Padpadasek man nga urnongen dagiti lagip nga imbati dagiti nagtuliden a paskua a pinalabas ko...

Kas maysa nga ubing, ti paskua ket panawen iti igagatang iti baro a bado, iti adu a sensilyo nga ipapetpet ti ninang ken ninong ko, ken dagiti agduduma a makmakan ken regalo. Nalabit, dagitoy ti rason a mangpaneknek iti pagsasao tayo a ti paskua ket panawen a para kadagiti ubbing. Iti itatapog ko iti kinaagtutubo, ti paskua ket panawen iti panagtitipon iti pagadalak iti hayskul. Panawen daytoy iti panagpipiknik gapu ta bakasyon, panagkaroling a kadua dagiti gagayyem ken kinaubingan, panaggamulo kadagiti krismas ball, ken pannakakumpleto iti misa de gallo. Naragsak iti panagtuno iti tinubong, panagbungon iti patupat ken pannakidanggay kadagiti gagayyem nga agpalibang iti lantakan. Daytoy ti panawen nga mangrugin a lumawa ti lubong para kaniak.

Bayat iti kaaddak iti kolehiyo, iti paskua ket panawen iti class reunions, panagikamakam kadagiti term papers ken research works. Panagatendar kadagiti pasken nga ituyang dagiti gagayyem ken naikappengan nga organisasyon, kasta metten a panagiprepara kadagiti pagsangaili nu adda sumangbay a gagayyem. Mainayon met ditan dagiti Kris Kringle ken gift giving. Kadagiti naudin a paskua, kaipapanan daytoy iti pannakakumikom ko iti trabaho. Panawen a panangtaming kadagiti banbanag a mangparaniag kadagiti rupa dagiti ubbing nga uggor ti World Vision – Philippines; ken panawen a pannakidanggay kadagiti relief operations ken pannakipagrikna kadagiti kakabsat a biktima kadagiti naglablabas a didigra a kas iti flash flood iti Quezon idi 2005, kasta metten iti trahedya iti Bikol iti napasamak a mudflow a naggapu iti Bulkan Mayon. Ah, agduduma ti maris nga inted ti paskua iti agduduma a tawen iti biag ko. Ketdi, adda amin bukod da a kaipapanan.

Immangesak iti nauneg. Intuloy ko a binnussog dagiti matak iti ngayed nga sagut ti naulimek a rabii ken ti kabus a bulan. Saan nga agpayso a sumardeng nga agtulid ti lubong. Kas met laeng a saan a maigawid iti panagpukaw ti nangayed a rabii tapno sumukat ti kinangayed nga itden ti lawag iti aldaw. Kasta met laeng ti biag ken dagiti dumteng a paskua kadatayo.

Nupay tinawen nga agduduma ti paspasamak wenno sirkumstansya a mangbalkot kadagiti paskua a naglabas, masapul a saan koma a napukaw ti mahika ken rimat ti paskua iti puso iti tunggal tao. Saan koma a maleppedan iti ray-aw nga itden iti panagkaykaysa, panagbibinnadang, panagsisinninged, ken dagiti abrasa nga isagut dagiti gagayyem ken ipatpateg. Kasta met nga saan koma a malipatan iti panagyaman tayo iti Namarsua nga isu’t gapu daytoy a tinawen a panagrambak ti lubong. Wen, awanen ti napatpateg pay a sagut ngem iti presensya ken pannakidanggay iti tumunggal maysa, nangruna dagiti kapapatgan a tao iti puso tayo, bayat iti isasangbay, pannakaselebrar, ken ilalabas ti paskua.

Anian to ngata ti itden iti masungad a paskua? Ania met ngata ti maaramidak wenno maiparaman ko a kontribusyon tapno nangayngayed ken narimrimat iti ilalabas na? Nasaysayaat siguro no mabiag ti “kinaubing” a naitalimeng iti lansad ti kinatao ti tunggal maysa kadatayo.

Napaisemak manen. Naunday pay met ketdi ti panawen sakbay a dumteng ti Disyembre, adda pay naan-anay a panawen tapno maplano dagiti mabalin nga aramiden. Immarakup ti pul-oy ti amian ket simmarut ti salemsem iti kaungak. Indissok ti papel ken bolpen ket pinidut ko met laeng ti gitarak. Tiningiting ko dagiti kwerdas, ket rinugiak ti pasakalye ti umuna nga ayog paskua nga ipatayab ko ita a tawen.

©02October2007leofinajanegalleta

NAUBON NGA AWENG TI PASKUA..

BAYAKABAK ( Dung-aw ti Nakaparsuaan)

2007-09-30T05:11:00.001-07:00

Naannayas,
Naulimek nga inka isasangbay
Mangep-ep,
Mangparegta iti agsalsalungayngay a rikna.

Naumbi,
Ritmo nga ipasngay sagiti saning-im
Namagkamet,
Rengngat a parnuay ti narungsot a tikag.

Naliday,
Bayabay mo a musika;
Ngem isu’t ray-aw,
Dagiti burayok ken ubbog.

Sika’t parnuay,
dagiti gagem ken kinaagum
nga agari-ari iti lubong;
Mangted saem iti puso ti langit.

Ngem ugasam,
babaen kadagiti linabag ken binukel
Nabengbeng a tapok, isu’t nangilemmeng,
Lasbang ken ngayed ti nakaparsuaan.

Talinaay,
ti isangbay dagiti nabuslon a tedted
Nupay sika’t ladawan,
Dung-aw ken pannakaupay.

Wen, sika’t ladawan
Saem a sagsagrapen ti langit,
Ngem biagem,
Dagiti agbugsot a busel ken bin-i.

Sika’t tanda,
dagensen a bakbaklayen ti Namarsua,
Agubbog ket agayus kadagiti mata ti langit
A mangmatmatmat damsak, iti lubong nga agdama.

©30September2007leofinajanegalleta

Sardam

2007-09-27T16:10:00.000-07:00

Naibun-ay manen,
dagiti maregmeg a rimat;
Ket manggargari,
dagiti paludip a naikupikop
iti agam-ampayag nga arapaap.
Tapno makiabrasa iti puyopoy;
Anges ti nakaparsuaan.

Maukagan ngatan,
dagiti burbutia a nanglaga,
kadagiti ladawan a di maibuksilan,
dagiti naukom a pangngarig;
Naidasay ket ngtaeng;
Iti lansad,
nagmanto a tangatang.

Gandaten ngarud
ti imatang a gaw-isen
dagiti parimrim ken isem;
Sakbay a parmeken ti sumangbay a lawag,
Ket iti sidong, agindeg;
Agnanayon a maitalimeng.

Pasungadan a dumteng,
Isasangbay manen makaay-ayo nga isem;
Nga isu’t mangitunda,
Rag-o iti naibalud a rikna;
Naunday a naidalit,
gapu’t rungsot ti panawen.

Wen, addan to ragsak
a maibengas kadagiti taldiap,
Ket iyarungaing to dagiti paludip
Iti isasangbay,
sardam a nagkawes
iti aranaar nga itden dagiti arkos ti langit,
Ket bayabayen to, ti talna ken ulimek.

©27September2007leofinajanegalleta

Linnaaw

2007-09-25T18:22:00.001-07:00

Maysa ka kadi
A saning-i.
Wenno parabur,
nga inyetnag ti langit?

Isangbay mo,
Rimat ken isem
Ti bulan ken bitbituen,
In-inuten, nga aglumen
parmeken ti lawag
Ti agbannawag nga agsapa.

Naibenggas
kadagiti tedted ken binukel,
Rimat nga parnuayen
Tunggal umisem dagiti raya
Iti sumingsingising,
Nga init iti daya.

Wenno maysa ka
Lua, nga nabukel;
Pinarnuay ti areng-eng
ken dung-aw ti langit,
Iti keltaang;
Rabii nga naulimek.

Isangbay ti Amian
kadagiti petalo,
A mangited raniag
Kadagitoy mata,
Iti tunggal parbangon
a sumangbay.

Ditoy lansad ti nakem
Sika’t sagot nga ited
Iti tunggal agsapa,
naynay a biag,
Ti itden na.

Iti kaano man,
Diak to pulos mailadawan
Dagiti gapu
ken kaipapanan.

Ngayed,
Iti tunggal tedted
A mangep-ep,
Kadagiti sennay ken dagensen;
Nga insangbay,
Rabii a naulimek.

©26september2007leofinajanegalleta

Daton

2007-09-25T18:21:00.000-07:00

Iruknoy ko’t sakaanam,
Dagiti naumbi nga aranaar
Itden dagiti pabelo a nasged
Iti darepdep ken parmata.

Indengam kadi,
Dagiti payapay,
Dung-aw ken sennaay
Karurua a naiwawa.

Timudem koma,
Araraw a naibenggas,
Kadagiti ayug ken aweng
Ipukpukkaw dagiti umel a saning-i.

Patgam a sapulek
Manipud lansad dagiti yuyeng
Lawag nga isu’t sungbat
Nauneg a burbutia ken pangngarig.

Saranayem ngarud,
Nakeltay nga arapaap
Ket maep-ep ti saem dagiti garumiad
Puso a napasag.

Maallangon koma,
Daydi napasag a namnama
Ket punasen ti ayat, sugat a gappuanan
Dagiti kamtud ken kinakapsut.

Pasungadam kadi,
Isasangbay natungpalen a kari
A mangsukon kadagiti rimat
Itden ti apagbettak a lawag.

©19september2007leofinajanegalleta

Iti Dumteng nga Agsapa

2007-09-25T18:19:00.001-07:00

Umel dagiti balikas
Nga impasngay dagiti sennaay
Gapu’t kinaawan gaway.

Inkur-it dagiti pagteng
Babaen kadagiti lua;
Kararua ken tinta, ti pluma.

Innummong ken binukel
Uged dagiti kalman ken malem
Ikupin manen, sumangbay a sipnget.

Dagiti maris,in-inut a naglumen,
Dagidi bukel ken tugot ti panawen
Nangiraked; naruay a tagainep.

Urayek ngad itan nga agrupsa,
Tali ken kawar a nangbekkes
Nangibalud ti regta ken anges.

Wen,umanayen; lininaaw a mangep-ep
Agdama a panannakawaw
Wayawaya nga itden, sumangbay nga agsapa.

Pasungadak ngarud, perreng ti tangatang
Taldiap ti langit a mangitunda
Sagut ti maipasngay a namnama.

©11September2007leofinajanegalleta

Josefina

2007-09-25T18:18:00.001-07:00

Makaanay ngata
Balikas a bugas
Agkubuar nga ayat
Daton ko kenka, Josefina?

Nupay mangmangegak
Sennay mo ken tarigagay
Sidong mo koma't pagtaengak
Di pay maikanatad ti panawen.

Naunday nga ulimek
Umel dagiti sainnek
Naibenggas panagitured
Imbakbaklay mo, Josefina.

Nadawel a sarangten
Watiwat nagbaetan ta
Panangpuros ko’t arapaap
Tubeng panagtaeng dita denna.

Iti baet dagiti panawen
A kalanglang mo’t ulimek
Ayug ti ayat ko,allingagem
Dayyeng ti pusok,Josefina.

Ibalibalikas lua nga agarubos
Diak maipaay a kanito
Panangtagibi, panangtaripato
A sangkauray mo,panawen ni lailo.

Umanay ngatan
Agdama a ladawan
Bungam a tinagibi
Mangpaisem kenka, Josefina?

13august2007leofinajanegalleta

[linabag a sagut ko iti ingungutek nga ina....]

Linabag A Sagut

2007-09-25T18:17:00.001-07:00

(Agosto 6: MAYSA A KABLAAW)

Gay-atek manen,
A laktawen mangliwengliweng a yuyeng,
Isu't mangitunda,
lansad kapanunutan a naitanem.

Pinadas ko idin,
A binatok lansad kararua ken panunot
Sinapul ko ti ubbog
a sungbat dagiti ubbaw a saludsod.

Binukel, tinagibi;nagtuliden a panawen
dagidi kullayaw ken buteng
Nupay nagitured adu a sainnek,
angkla a nangpaasimbeng ti nakem.

Diak nagsarimadeng,
A nangbirok sarming nga agikut kinapudno
Ta nadutukan ka a lawag dalan ko,
ngem apay a nalidem ti anaraar mo?

Naituding man,a sika’t saranay,
nasimbeng a teddek pagsanggirak koma
Ngem isu met dung-aw,saibbek ta puso;
kinaaawan talek iti kinatao.

Nu lagip ti sumken,
Dagidi nadawel,aldaw ken rabii a bugkaw nangilili;
Itan a naglumen,sinubbot ti langit
dagidi dagensen babaen sagut a kired.

Itan a naglawag,
Gameng a naikupikop,kadagidi ranggas ken kinalupoy
Baggak a nangsilnag,pakdaar kararuak;
isu’t nangitunda umisu a dana.

Gayam,sika’t sarming;
A paganninawak,mangipakita't tuok, kinadangkok
Gapu’t kinalupoy kararua ken nakem;
in-inut a nangpanday,nangpatibker kinataok.

Ngarud iruknoy ko ket awatem koma;
imet ko a sagut kasangay mo ita
Natarnaw nga ayat,kas panagyaman ko;
pateg nga agubbog kaungan toy puso.

Amak,managayat nupay ilinglinged mo
dagiti luluam nga agarubos
Nga isu’t imet ko tunggal pettat nga ipapanaw,
mail-ila a sidong.

[Naragsak na panagkasangay, Papangski Aran, :-)]

©3august2007leofinajanegalleta

DAWAT KEN Tarigagay

2007-09-25T18:15:00.000-07:00

Naipasngayak, babaen paparmatam;
Kadagita dakulap; damili, a nagsukugam.

Awan mulit na nga ayat, inggamer Mo ti kaungak;
Parabur Mo a pammateg, namagkamet pakabuklak.

Ngem sagut Mo a ladawan, inkupikop Mo a gameng;
Kas man rehas wenno pader, a nangibalud toy nakem.

Panagrukbab, panagraem, mangted leddaang ken saem;
Kas man punial a manggudas, napudno a langen langen.

Iyunnoy ko ngarud Kenka; parabur mo Itdem koma;
Araraw daytoy kararua, timudem ket patgam, Ama.

Patgam kadi nga agparang,kinangayed ti pagariam;
Parabur mo ken kaasim, isu koma’t maanninawan.

Ladawan nga insagot Mo, sarming a pakamatmatan;
Kinatan-ok ti ayat mo, saan a nailubongan.

Dakulap ko bendisyonam, mangted regta ken namnama;
Iruknoy ko’t sakaanam, gameng ti biag naindaklan,

Iti lansad kinataok , pitik toy puso ken anges;
Amin a tarigagay ko, isu’t sagut a napateg.

©31july2007leofinajanegalleta

Sennaay Ken Dayyeng

2007-09-25T18:12:00.000-07:00

I. Bituen

Anninawak man
Tanap iti sakaanam
Nupay nagpanes
Naiyaplag ti sipnget.

Naliday a sardam
Nagmanto ka manen,
Sennaay agkubbuar,
Sumuknor ti saem.

Kararua a naiwawa
Awagam, namnama
Rimat ti tangatang
Talinaay, itden na.

Aragaag a naruay
Padasek a tukuden
Riniwriw a rimat
Parmata, agtaeng.

Wen,umanayen;
Mangep-ep ti saem
Mangpunas dagensen
Puso a naimayeng.

II. LAYAP

Nupay arapaap
padasek man laeng
pengdan ni sainnek
panagtulid panawen.

Umel a saning-i
Pawayway ti panawen
Isasangbay, panagtaeng
Apagdarikmat laeng.

Bang-ar, anaraar, namnama, isem
Ilalabas mo, sennaay punasem
Ngayed talinaay, raniag nga itdem
Isem a narimat layap a nangayed.

[Ray-aw ken linglingay, padasem a biagen
Rimat ti tangatang, inka ngad purosen
Maikarim ngata, annadan, ilalaen,
Naruay nga isem, layap ken bitbituen.]

©16june2007leofinajanegalleta